Nabegando e lockdown di COVID-19

Manera lo bo por a skucha di presidente Alton Paas riba Facebook of Instagram, Fundashon Alton Paas tambe mester a adaptá kon e ta sirbí e personanan ku ta sufrí di un paralisis na Kòrsou durante e ultimo simannan aki.

Nos a plania nos 2020 kompletamente diferente for di loke ta pasando awor. Sinembargo nos ta konsiente ku bida tin bia ta trese su bueltanan meskos ku ora un persona haña dwarslaesie i ku e ta hañ’e isolá for di su komunidat dor ku e no por hasi tur kos manera antes.

Pesei nos por komprondé situashon i por a nabegá e temporada di ‘lockdown’ aki. Pa por a logra esaki nos mester a konta ku sosten di diferente persona pa asina nos por sigui sirbi e personanan ku un paralisis na Kòrsou.

Conference call online
Dor ku COVID-19 ta algu nobo pa rònt mundu, tur hende a kuminsá hasi pregunta i buska kontesta kon pa yuda otronan i mitigá e risikonan. Pa ku e area di dwarslaesie tambe a bin ku diferente plataforma pa duna informashon mas alkaso i resien posibel di fuentenan konfiabel. Dor di esei diferente profesional di ISCoS a pone un ‘conference call’ pa splika tokante e medidanan ku por tuma pa mitigá e risikonan di COVID-19.
Nos tabata tin Valentina Londoño ku ta un di nos trainernan sertifiká ku tin estudio di mediko pa por a volg e ‘conference call’ i prepará un resumen ku e puntonan importante kiko mester hasi pa minimalisá e risikonan pa keda kontagia ku e virus nobo. Esaki nos a pone den whatsapp group pa por a informá e personanan ku dwarslaesie.

Pump on wheels video
Danki na Ruth Kroes nos por a haña diferente bia den e simannan tras di lomba videonan di Ruth Kroes su ‘Youtube Channel’ ku algun minut di pump-on-wheels ku kada persona por a hasi na kas. Spesial pa esnan ku tabata aktivo hasiendo ehersisio i awor no ta moviendo mas pasombra mester a keda kas. E pump-on-wheels ta yuda sigur pa e dianan ei tene e kurpa aktivo. Pa algun dje videonan por klek aki

Tips di un neurosikologo pa dil ku e krisis
Haña un paralisis dor di un aksidente òf malesa ta un reto riba su mes kaba. Awor tin ku dil ku un pandemia adishonal ku por hasi e peso di bo situashon aun mas pisa. Danki na e neurosikologo Martha Atienzo nos a publiká un blòg ku ta duna 10 tip kon un persona ku un desabilidat fisiko por pasa dor di e krisis aktual.
Den un situashon fèrfelu asina’ki nos mester kòrda riba esnan vulnerable ku hopi bia mester di un èkstra yudansa pa por navegá tambe e temporada aki emoshonalmente pa por keda fuerte i stabil. Pesei e blòg aki ta sumamente balioso pa kualke persona. Por klek aki pa lesa.

Mensahe i yamadanan di sosten
Atrabes di añanan nos a bin ta forma un famia ku e diferente klientenan di AP Center. Kada persona ku ta bin hasi ehersisio na AP Center ta konsiderá e eksperensia na AP Center tambe komo un momentu sosial dor di kombersá i sosialisá ku otro tur momentu ku nan ta einan. Despues ku mester a sera AP Center temporalmente, tòg a keda ku kontakto telefoniko i via whatsapp pa mantené e interakshon sosial ei. Pues tabata un akshon nesesario komo sosten na esnan ku kisas normalmente ya sa ta isolá na kas dor di ta biba nan so òf ku masha poko sa tin kontakto kune.

Tradukshon i Publikashonnan di COVID-19
Durante di e ‘lockdown’ a bini diferente informashon for di diferente fuente pa por sa mas di e virus nobo COVID-19. Via di kontakto ku NASCIC i ISCoS a yega na e diferente rekursonan ku un hende por wak i sa kiko pa hasi spesial pa hygiena dor ku si bo ta usa ròlstul tin mas kaminda ku bo man ta mishi ku por pone bo mes mas den risiko.

Esei ta e algun di e kosnan prinsipal ku a dediká tempu na dje pa por a navegá e ‘lockdown’ di COVID-19. Manera semper mester keda positivo paso tur kos tin su motibu i tur kos ta sosodé den perfekshon.

Pesei e simannan tras di lomba a sirbí tambe pa prepará pa sigui. Fundashon Alton Paas ta konsiente ku e grupo ku nos ta sirbi tambe a keda afektá pa e ‘lockdown’ i awor nos ta mas motivá ku nunka pa sigui mehorá kalidat di bida di personanan ku un paralisis na Kòrsou.

Si abo tambe ke hasi un donashon pa yuda mehorá kalidat di bida di personanan ku dwarslaesie bo por hasi esaki libremente online via nos website òf bo banko preferí.