Dia 17 di mart ultimo Fundashon Alton Paas a tuma e desishon pa sera AP Center te pronto aviso komo medida di prekoushon. Asina lo a yuda baha e risiko ku nos ta pone nos klientenan ku ta e personanan ku tin chèns di desaroyá sintomanan mas grave dor di covid-19.
Gobierno tambe a deklará ‘Home Shelter In place’ komo medida di prekoushon pa ‘flatten the curve’. Awor despues di 6 siman por kuminsá mira un lus na final di e tunel kaminda gobierno a kuminsá deskalá sierto di e medidanan pa asina kosnan por kuminsá funshoná bèk manera promé.
Esei ta nifiká pa nos tambe ku mester kuminsá prepará pa ora nos por risibí nos klientenan bèk pa asina nan por sigui hasi nan ehersisio plus hasi uso di Wheelee komo transporte.
Fundashon Alton Paas ta konsiente si ku un persona ku paralisis ku tabata aktivo hasiendo ehersisio keda 6 siman òf mas sin move por afektá su kalidat di bida.
Pues e ta importante pa prepará pa kada persona por bin sigui ku nan ehersisio pa por mantené nan kalidat di bida.
Sinembargo mester tene na kuenta ku deskala no ta nifiká ku e peliger di e COVID-19 no ta eksistí mas. E realidat aki ketu bai ta keda un risiko i prinsipalmente dor ku nos no por mira futuro.
Esaki ta eksihi un aserkamento diferente pa por tene e salu i bienestar di tur nos klientenan den balansa. Pesei nos a pone kontakto ku departamento di GMN pa por haña e informashon nesesario.
Ku esaki nos komo Fundashon Alton Paas ke bisa ku pa AP Center i Wheelee lo bai adaptá e forma kon nos klientenan a kustumbra ku nos servisionan basa riba konseho i sugerensianan ku nos haña pa asina sòru ku nos ta kumpli ku eksigensianan di gobierno ora ta asina leu i alabes kumpli ku e nesesidatnan di nos klientenan.
Manera ya por a tende kaba ku e situashon aktual ta algu ku nos niun no por a premirá, ni tabata prepará pe. Nos no por a imaginá nunka ku algu asina chikitu i invisibel lo por tin un efekto asina grandi riba nos bida diario. Apesar di esei nos ta keda ku kara na laira ku fe i positivismo ku nos lo sali mas miho for di e situashon aki pasobra for di tur eksperensia nos ta krese i esaki tambe ta un temporada di kresementu pa nos komo organisashon.
Nos ke gradisi tur hende ku ketu bai tambe a sigui kere den nos i ta biba ku nos e temporada aki ku asina atrabes di e donashonan mensual tambe ku tog nos por a logra kubri mayoria gastu ku mester a kumplí kune.
Keda pendiente pa mas informashon pronto i pa kualke pregunta òf remarke por tuma kontakto ku nos libremente na 5100087