Un lus den horizonte

Apr 28, 2021 | News

E epidemia ku nos ta pasando aden a trese hopi reto pa tur hende. Manera ya indiká, e reto ei den hopi kaso ta dòbel pa e personanan ku tin un desabilidat i tambe ku ta dependé di otronan pa nan por biba.
Pesei Fundashon Alton Paas ta konsiente ku kada dia òf siman ku bo keda sin hasi ehersisio tambe por tin konsekuensia negativo pa bo salu. Nos ke krea e posibilidat ku bo por keda den moveshon pabo por mantené bo salu spesial den e tempu aki ku nos salu ta asina importante pa kuida.

Entretanto, Gobierno tambe a rekonosé ku nos ta parti di kuido i ta vital. Gobiernu a duna nos eksonerashon pa nos por habri AP Center plus transportá persona den ròlstul o problema kroniko ku mobilidat ku Wheelee.
Esaki a hasi posibel ku for di 12 di aprel nos por a kuminsá risibí klientenan pa bin hasi nan ehersisio.

Tur reglanan di COVID-19 ta keda vigente. Tur persona ku ke drenta Wheelee òf AP Center mester tin un tapaboka bisti. Mester usa handsanitizer tambe ora drenta Wheelee òf AP Center.

Komo organisashon nos ta enkurashá tur persona sea ku ta kliente òf famia pa bakuná. Laga nos duna di nos banda pa yega na ‘herd immunity’ ya asina nos por logra derotá e menasa di e corona virus na Kòrsou.