Nos a drenta den un era nobo kaminda higiena a bira aun mas esensial. Pa straño ku e ta parse, no ta algu nobo pero sí e importansia pa pone mas atenshon na loke nos ta hasi, no solamente pa nos mes pero mas bien pa e otronan rondo di nos.
Komo un sentro ku ta traha ku e personanan ku ta e grupo di risiko haltu pa covid-19 e atenshon pa e detayesnan di higiena ta aun mas esensial. Pasobra nos ta konsiente ku si e persona den ròlstul keda kas e por tin konsekuensia negativo pa su salú i si e sali su kas tambe e ta kore e risiko di yega na konsekuensianan negativo pa su salú.
Pesei nos ke kumpli ku nos klientenan dor di keda pone atenshon riba e aspektonan di higiena i distansia sosial. Esei a pone nos hasi algun adaptashon adishonal di higiena pa por kumpli ku instrukshonnan di gobierno.
‘Handsanitizer’
Den nos sentro nos tin tres (dispenser) handsanitizer den nos lokalidat. E ultimo ku a bin aserka ta esun na nos entrada kaminda nos a asta pone un bòrchi pa instruí e persona pa usa handsanitizer asina ku e drenta. Nos handsanitizer nan tambe tin 70% di alcohol pa por di berdat yuda tene man limpi.
Den AP Center tin dos baño pa kliente. Unu pa personanan ku un desabilidat i unu pa personanan ku por kana. Den kada baño tin habonnan spesial ku tur hende por laba nan man kualke momentu ku nan ta den AP Center.
Distansia
For di despues di e promé ‘lockdown’ a hala e diferente ekiponan pa asina krea mas espasio entre personanan ku ta train den AP Center. Alaves e stulnan kaminda personanan ku sa sinta warda nan famia kaba di train. E stulnan a keda separá pa por yega na e distansia social den AP Center mes.
Awor a separá tambe e entrada i salida di AP Center. Tin un porta spesifiko pa drenta i un spesifiko pa sali.
Registrashon di bishitante
A kuminsa registrá kada persona ku drenta den AP Center. Pa asina por tin mihó bista ora mester hasi ‘contact-tracing’. Pesei asina ku un persona drenta nos tin Stephanie ku ta traha na bali ku ta aserka e persona pa tuma su nòmber, number i email pa asina nos por pone nan digital den nos sistema.
Reglanan nobo
A introdusí tambe reglanan nobo pa tur kliente i alaves trainer pa por yuda kumpli ku e protokòlnan di hygiena i distansia sosial. Ku por ehèmpel mester bisti tapaboka ora ta train pasobra na diferente momentu lo mester di yudansa di un trainer òf asistente na un ekipo òf sierto ehersisio i no por mantene e distansia di 2 meter. Pesei kada persona mester tin nan tapaboka òf kualke otro forma di protekshon manera un ‘face-shield’ bistí. Algun otro regla ta ku kada persona mester tin nan mes sèrbètè pa por usa den e sentro. Un regla mas ta ku si e persona ta malu òf tin un famia malu den mesun kas mester mèldu promé ku bini AP Center pa manehá mihó e risiko den nos sentro.
Limpiesa di ekipo
Den AP Center tin 3 bòter ku alkohol puru di 70%. Esaki ta spesial poné pa tur trainer por desinfektá kada ekipo promé ku un kliente usa esaki.
Alaves a oumentá e frekuensia total di limpiesa den e sentro ku tur mainta tin un persona ta limpia hinter e sentro promé ku habri.
Esakinan ta pasonan ku nos a tuma pa por kuida nos kliente i nos trainernan ku ta den AP Center. Nos ta keda ku kontakto frekuente ku departamentu di Epidemiologia pa por ta na altura di kualke desaroyo òf instrukshonnan di gobierno pa sigui manehá e era nobo ku nos a drenta aki.
Si bo tin mas pregunta òf kualke remarke, bo por tuma kontakto ku nos libremente via whatsapp òf yama na 5100087.