Dia 5 di sèptèmber ta dia mundial di dwarslaesie. E dia aki a keda krea pa e organisashonnan di medikonan i sientificonan internashional ku yama ISCoS òf tambe International Spinal Cord Society.
Kada aña riba e dia aki ta pone atenshon na dwarslaesie i e esfuersonan pa krea un mundu mas inklusivo pa personanan ku a haña un dwarslaesie por logra partisipá aktivo den komunidat.
Kada aña ta skohe un tema pa por dirihí tur esfuerso rònt mundu pa trese un mensahe den komunidat. E aña aki e tema di dia mundial di dwarslaesie ta ‘Covid-19 i dwarslaesie: Mantene bo mes salú’.
Personanan ku un dwarslaesie tambe ta kai den e grupo di risiko pa haña sintomanan grave di covid-19. Pesei hygiena ta aun mas importante e temporada aki.
Den kuadro di esaki Fundashon Alton Paas a publiká un video ku algun teps di hygiena spesial pa personanan ku ta usa un ròlstul.
Tin kamindanan di nos ròlstul ku nos ta mishi frekuente. Entro otro:
- E brek
- E sosten di pia
- E man dje ròlstul
- Etc…
Esakinan ta kamindanan ku mester haña un limpiesa regular pa por mantené nos mes safe e temporada aki.
Den e video ta mustra e diferente kamindanan ku nos ta mishi kune regular i ku mester limpia nan pa asina mantene e hygiena di e ròlstul.
Den kuadro di e dia aki tambe Fundashon Alton Paas a hasi algu mas ku koperashon di Alcolado Glacial pa pone algun pòtchi di glacial ku por parti pornada spesial na personanan ku ta usa ròlstul. E pòtchinan aki di glacial tambe ta kontene 70% di alcohòl ku tambe por sirbi pa desinfectá man spesial dor ku tin momentu ta difisil pa yega na handsanitizer.
Pa e persona den ròlstul ku ta interesá pa tuma su pòtchi di glacial, e mester manda un whatsapo pa nos na 5100087 i einan lo haña un persona di fundashon ku por palabra ku ne pa yega na bo pòtchi di glacial gratuito.
E kantidat ta limitá pues nos ke enkurashá esnan ku ta interesá pa tuma kontakto ku nos mesora promé ku nan kaba.
Nos ta konfia ku esaki tambe por sigui yuda nos aki na Kòrsou pa sigui protehá nos mes. Si nos kada un hasi nos parti, sigur nos ta logra vensé.
Pesei kòrda, kuida bo mes pa nos por kuida otro.