Kontradisiendo tur diagnostiko durante Tapeit Kòra

Dia 14 di mart 2020 tabata tin un evento spesial na Sambil kaminda 8 persona ku a sufri di un paralisis a mustra nan logronan komo kulminashon di un proyekto di ehersisio intensivo di AP Center.

E proyekto di ehersisio aki ta un inisiativa di Fundashon Alton Paas, co-finansia pa Ministerio di SOAW ku a start aña pasa oktober na AP Center. AP Center ta e sentro di ehersisio spesial pa personanan ku ta sufri di un òf otro paralisis sea dor di dwarslaesie, atake selebral i òf otro kondishonnan neurologiko. Tin mas ku 50 persona ku difikultad di mobilidat ku ta bini pa hasi ehersisio pa mantené nan kurpa den

kondishon i minimalisá komplikashonnan mediko. Banda di esei e sentro tin 3 trainer sertifiká pa e Activity-Based Training ku ta hasi Kòrsou e uniko sentro den Karibe ku por yuda personanan ku un paralisis despues di nan rehabilitashon pa por sigui desaroya nan mes ku e meta pa rekuperá funshonnan bèk despues di a sufri di un paralisis.

E proyekto ku a start na oktober 2019 a duna e posibilidat ku 12 persona total por a pasa 5 luna bou di guia di e trainernan sertifiká aki pa haña training 2 bia pa siman pa 2 ora largu.
Adishonal tabatin tambe algun seshonnna di counseling na inisio bou di un guia profeshonal pa prepará kada persona mentalmente pa e proyekto.

Tradishonalmente ora un persona haña un paralisis sea parsial òf hinter su kurpa, e pensamentu ta ku masha poko e persona tin chèns di rekuperá i speshalmente si mas tempu pasa. Den e proyekto aki tabata tin persona ku tin 1 aña despues di nan aksidente i asta riba 10 aña di nan aksidente.

Pues pa e dia di Tapeit Kòra na Sambil a sirbi komo prueba ku e ta posibel. Di personanan ku a bai asina

dilanti ku awor nan mes por lanta para, haña moveshon di nan pianan, lanta para bèk despues di ta sinta abou, mas balansa pa tira stap, kana sin asistensia.
Diferente logronan ku kada persona a hinka hopi esfuerso pa alkansá. E no tabata algu fasil, el a eksihí hopi displina, positivismo i fe.

E meta di e proyekto tabata pa yuda hasi kada persona ku tin un desabilidat fisiko mas independiente. E logronan aki a nifika ku e personanan aki awor por logra hasi sierto kosnan nan mes ku menos yudansa i ku ta yuda mehorá kada unu su kalidat di bida. Esaki ta netamente e loke Fundashon Alton Paas a lanta pe ku ta mehora e kalidat di bida pero ta solamente ku yudansa di kontribuidornan manera SOAW, Reda Sosial, amigunan di Fundashon Alton Paas ku por hasi e tipo di inisiativanan aki posibel. Pues un gratitut spesial ta bai na tur ku a kontribuí i boso por ta orguyoso di e impakto ku boso tabata tin den bida di personanan ku un parálisis, no solamente via e proyekto aki pero tambe tur e otronan ku ta bini den futuro.