Abo Tambe Por
Lo ta e tema di e sigiente fitness challenge di Fundashon Alton Paas
WILLEMSTAD, Nos ta bibando den un komunidat ku na momentu ku un persona sufri di un parálisis sea dor di un dwarslaesie, ataka selebral òf kualke otro difikultat neurologiko e ta wòrdu konfrontá ku diferente retonan ku pa un otro persona lo ta kosnan e no tin ku ni pensa mes riba dje i awor abo tambe por hasi un diferensia den bida di otronan.
Ta asina ku na momentu ku un persona haña un atake selebral òf dwarslaesie e ta bai hospital, dependé di su kondishon e ta bai rehabilitá pa e prepará pa bai bek den komunidat. Na momentu ku e kaba di rehabilitá i ku e yega kas einan ta e kaminda ku e persona ta haña mas reto su dilanti manera transporte, aksesibilidat, manera pa e por tene su kurpa aktivo i salu. Hopi bia un kaso di dwarslaesie òf atake selebral ta sosodé inesperá i ta kambia e persona su bida kompletu i awor e tin ku bai siña kon pa atendé ku su bida di un forma diferente. Ta asina ku kada dia ku pasa e ta bira mas vulnerabel pa desaroyá komplikashonnan médiko. Prinsipalmente dor di no ta aktivo i e isolashon for di komunidat. Esei no mester ta asina i awor abo por hasi un diferensia den esei atraves di ‘The Annual Fitness Challenge’. E plataforma ku ta stimulá inklushon i moveshon pa nos tur ta huntu hasiendo un diferensia pa personanan ku ta sufri di un parálisis dor di dwarslaesie, atake selebral òf kualke otro difikultat neurologiko ku nan por yega na un mihó kalidat di bida.
Na momentu ku nos uni den moveshon durante di fitness challenge nos ta logra pone mas atenshon na nos abilidatnan na 
lugá di nos desabilidatnan i esei ta pone ku nos komo komunidat kompletu ta alkansá inklushon i un estilo di bida saludabel. P’esei e tema di e di 6 edishon di ‘The Annual Fitness Challenge’ ta “Abo tambe por”. Pasobra abo tambe por move. Abo tambe por hasi un diferensia i dia 10 di mart 2019 lo ta e dia ku abo ta bai move pa hasi un diferensia den bo mes bida I tambe den bida di otro nan.
Manera semper Fitness Challenge lo ta 6 ora largu kuminsando for di 6’or di mainta te 12’or di mèrdia ku 3 área ku bo por partisipá aden. E área 1 ta e kaminata ku ta sea 5 km òf 10 km ku ta kuminsá i kaba na International School. E área 2 ta e 
sekshonnan di fitness den e ouditorio di International School mes kual ta konsistí di 8 diferente tipo di programanan di fitness di kual kada un lo ta 45 minüt. E área 3 lo ta e área di spinning di kual kompanianan por forma grupo pa registrá i abo kubo grupo ta haña un baiskel i e reto ta ku boso tin ku laga e baiskel ei keda spin hinter e 6 ora pero boso tin ku plania kon largu kada persona ta bai riba e baiskel ei. Karchinan ya ta optenibel na Samsom Colon, Van Den Tweel zeelandia i tambe Sport Spot Boutique. Karchi pa adulto ta 35 florin i esaki ta bálido pa e fitness plùs kaminata. Karchi pa mucha i 60+ ta fl. 15 i esaki ta bálido pa e fitness plùs kaminata. Karchi di kaminata so ta 15 florin. Nos ke enkurashá tur hende pa buska nan karchi trempan paso e aña aki ta bo oportunidat. Si moveshon ta yuda un persona paralisá bai dilanti, abo tambe por!
