CURACAO INCLUSION PROJECT
Fundashon Alton Paas ta start awe ku e promé fase di e proyekto ku audit di 56 hotel i/o restourant miembro di CHATA
WILLEMSTAD, FUNDASHON ALTON PAAS ta hopi kontentu i agradesido ku e partnership huntu ku CHATA i CTB pa inisia pa promé bia e ‘Curacao Inclusion Project’ kual ta sirbi pa stimulá asesibilidat i inklushon na Kòrsou.
Asesibilidat ta birando un tema ku ta hañando mas i mas atenshon mundialmente. Aña pasa den sèptèmber World Tourism Organisation a promové ‘Accessible tourism for all’. Hulanda ta organisá e aña aki pa di 17 biaha ‘Week van Toegankelijkheid’ den e siman di 2 pa 7 òktober. Na Kòrsou tambe asesibilidat ta un tópiko ku ta bin dilanti positivamente i negativamente. Den e kasi 5 aña di eksistensia di Fundashon Alton Paas e mayoria parti di nos komunidat ta ekspresá ku Kòrsou no ta un isla asesibel. Nos tambe ta konkluí esei pasobra no tin niun lei ku tin di haber ku asesibilidat ni tampoko no tin niun kaminda indika kiko ta hasi un luga asesibel.
Loke ta hasi e topiko aun mas relevante ta dor ku na 2016 Hulanda a raktifika un tradado di Nashonnan Uni pa Personanan ku Desabilidat. E tratado ta indika kon un pais mester trata un persona desabilita.
Awor ku Hulanda a ratifika e tratado i a bini ku ‘Wet toegankelijkheid bedrijven en publieke gebouwen’ a pone ku pa yanuari 2017 tur luga ta obliga di ta asesibel pa medio di lei. Kòrsou ainda no a ratifika e tratado aki. A pesar di tur informashon i konklushon, nos mester rekonose instansianan ku di nan propio inisiativa a hasi nan establesimentu asesibel. Pa esei Fundashon Alton Paas a krea e ‘Curacao Inclusion Project’ ku ta konsisti di 4 fase ya asina tur persona den ròlstul sa kua ta e luganan asesibel ku por bai i kon asesibel nan ta. E promé fase ta bai kuminsá e siman aki kaminda lo bai hasi un audit di 56 hotel i restaurantnan ku ta miembro di CHATA pa un tim di studiante, algun persona den ròlstul, profeshonalnan den e área i ergotherapeut. E tim ta bou di guía di ‘ergotherapeut’ Maaike Versteeg i usando kriterianan for di ‘Handboek Toegankelijkheid Nederland en Keurmerk Integrale Toegankelijkheidsstandaard’ a krea un lista di kriteria basiko pa asesibilidat den horeca pa nos por yega na e lugánan ku ta aksesibel.
Fundashon Alton Paas a bin ta rekonosé ku e ta sirbi komo un plataforma ku ta konektá sektor priva, publiko i tambe e komunidat di dwarslaesie pa por bini ku inovashon i kombersashonnan di desaroyo pa nos komo isla sigi bai dilanti i ku nos tur, abilitá den ròlstul òf nò, por benifisia di dje. Pesei komo parti di klousura di e proyekto lo bai anunsia e 3 hotel, restaurant i doño di trabou ku mas puntuahe di kual lo duna un rekonosementu na esun mas aksesibel di kada un kategoria.
