Willemstad, Den luna di sèptèmber nos a festehá e di 11 aniversario di Fundashon Alton Paas ku orguyo i gratitut pa un dékada di dedikashon na mehoramentu di bida di hende ku dwarslaesie i otro desabilidatnan neurólogiko na Kòrsou.
Fundá dia 7 di sèptèmber 2012, Fundashon Alton Paas semper a dediká nan mes pa yuda kontribuí na konsientisá i mehoramentu di kalidat di bida di hende ku dwarslaesie i otro desabilidatnan neurólogiko. Den e último 11 aña, e organisashon a logra alkansá eksitonan impresionante i a hasi kontribushonnan importante na komunidat.
Un di e eksitonan notable di Fundashon Alton Paas ta e oportunidatnan ku nan ta brindá pa hende por logra independensá nan mes dor di nan fasilidat speshal di ehersisio i nan servisio di transport adaptá pa ròlstùl. Hopi hende a logra rekobrá nan independensia, bira mas fuerte, i haña alivio di nan doló, loke a hasi nan bida sosial mas aktivo posibel. Algun hende hasta a logra mobilidat i mas funshon.
Además, Fundashon Alton Paas a hunga un ròl importante den kresementu di bista riba akseptashon i inklushon na Kòrsou. Nan lucha a trese ku awor bo ta tende den sistema di hustisia e palabra ‘dwarslaesie’ den sentensia i a yuda ku mas edifisio a bira aksesibel pa ròlstul.
Ariba e dia di nan 11 aniversario, esta 7 di sèptèmber 2023, nan a risibí bishita di un miembro di parlamento, Ramon Yung, i nan a invitá klientenan di pasado na nan fasilidat di ehersisio pa un ora di ehersisio gratis komo un muestra di agradesimentu
pa nan sosten konstante. Tambe a invita algún kolaborador, konseheronan i miembronan di direktiva di pasado pa por a apresia e kresementu atraves di añanan huntu.
Fundashon Alton Paas a konstruí kolaborashonnan importante, tantu na nivel lokal komo internashonal, ku organisashonnan manera Neuro Ex, Dwarslaesie Organisatie Nederland, Sociedad Latino Americano de Paraplegicos, North American Spinal Cord Injury Consursium, Bob Car Wash, ARPO Body Shop, Fortuna, IBIS, Bric, CX Pay, Kuki+ko, MCB, Reda Social, Ministerio di Bienestar, Ministerio di Salubridat, Ministerio di Desaroyo ekonomiko, i hopi otro mas. Fundashon Alton Paas a yuda trese fundashonnan trahando riba e tereno di desabilidat huntu pa selebrá abilidat di personanan ku un desabilidat riba Dia Internashonal di Personanan ku Desabilidat 3 desèmber durante e ultimo 4 añanan.
Den e último 5 aña, e organisashon a hasi un promedio di 2000 kareda pa aña i a risibí un promedio di 45 kliente pa luna ku ta bin nan fasilidat pa ehersisio.
E komunikado di prensa aki ta un ekspreshon di gratitut i apresio pa e partner, donanantenan, klientenan i boluntarionan ku a yuda Fundashon Alton Paas pa hasi un diferensha den bida di personanan ku dwarslaesie i otro desabilidatnan neurólogiko na Kòrsou. Tur esakinan ta pasonan riba e kaminda pa e vishon un futuro sin limitashon. Esaki ta nifiká un Kòrsou kaminda kualke persona por partisipá aktivo den komunidat apesar di kualke sirkumstansia ku por aparentá komo un desabilidat.