Fundashon Alton Paas ta hopi gradesido ku den un grupo chiki di personanan por a lansa su reportahe sosial di aña 2020.
Djamars último na e lokalidat di ehersisio AP Center tabata tin e lansamentu di e dokumento ku ta ilustrá e impakto di tur e sosten ku Fundashon Alton Paas a risibí durante aña 2020.
E aña ei tabata tin diferente retu ku a presentá spesial dor di e pandemia ku tur dia nos ta siñando mas i mas kon pa enfrentá esaki.
Maske kon e retonan tabata tòg a hasi maksimo esfuerso pa keda enfoká riba e vishon ‘Un futuro sin limitashon’. Esaki a yuda ku tin diferente lès ku nos por a siña i tambe diferente logro.
Esakinan lo bo por mira bèk den e reportahe digital ku Fundashon Alton Paas a krea den forma di un revista. Pesei e reportahe tin e nòmber ‘2020 Impact Report’ dor ku ke pone atenshon na e impakto, e resultadonan di 2020.
Den e reportahe aki lo bo por haña:
- 6 entrevista
- Link pa proyektonan hasí
- Sifras importante
- i mas….
Ta di dos bia ku Fundashon Alton Paas ta krea e reportahe sosial aki den forma di un revista digital ku bo por wak riba e
website www.issuu.com. E promé bia tabata di aña 2018. A publiká e reportahe sosial di 2018 tambe ku diferente potret, entrevista, datos importante i hopi mas.
Un kos ku a inkluí den e reportahe aki ta un artikulo na memoria di Rudy Wijngaarde ku a fayese den 2020. Sr. Wijngaarde tabata traha na Reda Sosial i a hasi hopi pa yuda komunidat i tambe Fundashon Alton Paas pa por mehorá kalidat di bida di esnan den nesesidat.
Durante di e lansamentu a entregá un kopia di print na e famia di defuntu Rudy Wijngaarde.
Un invitado spesial tambe di e anochi tabata Minister Larmonie-Cecilia ku a duna algun palabra despues ku presidente Alton Paas a presentá e kontenido di e reportahe na e invitadonan.
Minister Larmonie-Cecilia a gaba e trabounan di Fundashon Alton Paas i a pidi e Fundashon pa sigui ku e trabaonan.
Ku esaki Fundashon Alton Paas ke enkurashá tur hende pa klek riba e link abou aki pa por bai lesa e ‘2020 Impact Report’.