Esei tabata ekspreshon di Sheryl Losiabaar ku ta miembro di Konseho Supremo Elektoral durante reunion ku 3 di e fundashonnan ku ta traha pa personanan ku un desabilidat kual ta Fundashon Pro Bista, Asosashon Totolika i Fundashon Alton Paas.
Un kombersashon sigur balioso pa sigui inkluí personanan ku un desabilidat asta den e proseso di elekshon. E kombersashon aki tabata un inisio pa prepará i mehorá eksperensia di personanan ku un desabilidat pa elekshonnan ku ta bin i no solamente persona den ròlstul pero tambe personanan ku otro desabilidat.
Puntonan ku a bin dilanti ta e echo ku Konseho Supremo Elektoral ta obligá pa kumplí ku e lei di elekshon i den e lei ta
menshoná solamente tokante personanan ku un desabilidat visual. Pues si tin un hende ku ke vota pero e mes no por uza su man, segun lei e no por haña yudansa di un persona di konfiansa pa yud’é depositá su voto.
Loke si ta posibel ta ku e persona ku tin un desabilidat ku mester di yudansa por haña yudansa di sea e presidente di e urna òf un persona di su konfiansa pa drenta e urna, bai té na e lokèt, habri e papel di vota, pone e pòtlot den e persona su man i sali bai. E persona mes mester marka e rònchi segun lei ta indiká i e por bisa ku e ta kla i e persona ku ta yud’é ta dobla e papel bèk i pon’é den e buzon pe. Si akaso e persona a bai marka e rònchi i despues resultá ku ela hasi fout òf dor di falta di grip a marka dos rònchi, e por bisa ku ela hasi un fout i e presidente ta tuma e papel di vota, stèmpel e komo ‘onbruikbaar’ i e persona tin solamente un chèns mas pa haña un papel di vota nobo pa e por vota.
Kada presidente di urna ta responsabel i tin e autoridat pa tuma desishon den sirkumstansianan kaminda un persona yega i indiká ku e tin un desabilidat pasobra no tin hopi espasio den lei ainda pa tene kuenta ku personanan ku un desabilidat. Esaki ta algu ku parlamentarionan so tin e posibilidat pa mehorá dor di adapta e lei nan eksistente di elekshon ku konseho supremo elektoral ta obligá na mantene su mes na dje.
Kada persona su voto ta balioso i Fundashon Alton Paas ke enkurashá mas hende ku un desabilidat ku a risibí nan karchi pa vota pa bai vota. Hasi uso di bo derechi di voto.