A sobra karchi nan di 35 florin pa fitness ainda ku tambe por kumpra i partisipá na kaminata
WILLEMSTAD, Fundashon Alton Paas ta hopi kontentu i agradesido ku e sosten i reakshon riba e yamada na komunidat pa e di 6 edishon di e Annual Fitness Challenge. Esaki a pone ku mayoria di karchi pa kaminata ya ta kabando.
No a sobra masha dia mas pa yega 10 di mart pa e dia ku Kòrsou lo ta den moveshon pa yuda mehorá kalidat di bida di personanan ku dwarslaesie i otro difikultatnan neurologiko. Dor di tur e interes tur e karchinan pa e kaminata di 15 florin serka Fundashon Alton Paas i su rebendedónan a kaba. A sobra karchi di kaminata di 15 florin solamente serka e puntonan di benta kual ta Mensing’s Caminada, Van den Tweel Zeelandia, Samsom Solon i Sport Spot Boutique. Na momentu ku e karchinan di 
15 florin kaba, ta keda solamente e karchinan di 35 florin di fitness kual tambe por usa pa partisipá na kaminata. Ku e karchi di 35 florin di fitness bo por bai kaminata i ora bo yega bek International School bo por drenta den sala di fitness i partisipá na kualke un di e sekshonnan di fitness ku a sobra riba e dia ei. Meskos ta konta pa mucha i 60+. Bo por kumpra e karchi di fitness di hóben / 60+ pa partisipá na e kaminata i ora bo yega bek for di e kaminata bo tambe por partisipá na e sekshonnan di fitness ku tin den sala.
Mester bisa ku ya tin tur T-shirtnan kla pa e repartishon. E fechanan pa tuma bo T-shirt ta dia 6, 7 i 8 di mart. Entre 4’or i 7’or na AP Center Colon, Unit 004 i djasabra parti mainta di 9’or pa 1’or tambe tin e oportunidat pa tuma T-shirt. Nos ke enkurashá tur esnan ku a kumpra karchi pa tuma bo T-shirt adelantá pa bo por skohe e tamaño ku ta pas bo mihó. Mas lat bo bin tuma bo T-shirt lo bo tin ku skohe for di e tamañonan ku a sobra.