Atrabes di e siguiente Fitness Challenge di Fundashon Alton Paas Dia 10 mart 2019 na International School
WILLEMSTAD, Un total di 14 instruktor ta forma e base pa e éksito di e fundraising di mas grandi di Fundashon Alton Paas kual ta e ‘Annual Fitness Challenge’. Esaki pa motivá nos komunidat pa move i ta saludabel i alabes kontribuí pa mehorá kalidat di bida pa personanan ku dwarslaesie i otro tipo di parálisis.
The Annual Fitness Challenge a kuminsá basa riba e mensahe ku Fundashon Alton Paas semper a bin ta promové ku ta moveshon ta importante pa nos salu. Pa un persona ku ta sufri di un òf otro parálisis ku ta strob’é di move su kurpa ta hasié imperativo pe keda aktivo pa kompensá e otro partinan ku no ta move.
For di esei a lanta e idea pa motivá esnan ku si por move nan kurpa òf kualke parti di nan kurpa pa move lokual ku bo por move. Esaki a pone ku diferente di e instruktornan a bin ta sostené e mensahe aki tur e añanan i e bia aki asta di 6 biaha. Ta danki na e instruktornan aki por organisá fitness challenge. Tin 3 instruktor ku tin 5 aña aportando gratuitamente. P’esei komo gradisimentu na nan nos a duna un muestra di apresio den forma di un plakat na Charlyne Balentina ku ta duna Zumba, Helen Griffith ku ta duna Pilates i Sabina Evertsz ku ta duna spinning.
Nan tambe lo tei manera bolo e aña aki atrobe pasobra nan ta kere den e kousa i ta mira e impakto di nan aporte. Un instruktor ku e aña aki ta bira su di 5 aña aportando ta Janina Charles ku ta duna Yoga. Pa e otro instruktornan di fitness nos lo tin Ruth Kroes ku tei atrobe pa Pump On Wheels ku ta e seshon spesial pa personanan den rolstoel.
Nos tin Raymundo Betancourt ku ta duna Fit Combat. Pa e di 6 edishon aki tambe nos lo tin dos instruktor nobo kual ta Nelson John Tremur ku ta duna Salsa Mania. E otro instruktor nobo ta Dangelo Look ku ta bai duna e seshon pa mucha. Pa e área di spinning nos lo tin Kristely Soleana, Meliza Garmers, Wendley Ursulita, Diana Lopez i pa promé bia den spinning nos lo tin Tirsa Garmers i Nancy Werner.
Un programa yená ku instruktornan entusiasmá pa hasi un diferensia huntu kubo. Pa e kaminata nos tin un biaha mas sosten di Jolly Walkers pa guia esaki ku e mesun ruta di aña pasá. Pa e ruta di 5 km nos ta sali international skol bai Magrietlaan – Regentesselaan – Don Martina Blvd – Schottegatweg Nrd – Wilhelminalaan – Margrietlaan pa yega bek International School. Pa e ruta di 10km tambe nos ta sali International School subi Magrietlaan pasa Regentesselaan – Don Martina Blvd direkshon Fokkerweg – Schottegatweg Zuid – Schottegatweg Oost – Schottegatweg Nrd – Beatrixlaan – Konninginnelaan i bin bek International School.
Lo tin bòrchi riba kaminda si pa mustra e direkshon di e kaminata. Manera a indiká kaba karchinan ta optenibel na Samsom 
Colon, Van Den Tweel Zeelandia i tambe Sport Spot Boutique. Danki na e diferente spònsernan na momento ku bo koperá bo ta haña tambe un T-shirt, awa i fruta. Repartishon di T-shirt lo sosodé e tres dianan promé ku fitness challenge.
Keda pendiente pa mas informashon di esei. Nos lo publiká mas den febrüari. Mientras tantu nos ke motivá abo tambe pa kumpra bo karchi awe mes pa hasi un diferensia pasobra #AboTambePor.