Fundashon Alton Paas ta gradisí Rotary Club Willemstad pa un eksitoso ROTA FUN(D)RIVE
WILLEMSTAD, Rotary Club Willemstad a organisá su evento ROTA FUN(D)RIVE spesial pa rekoudá fondo pa un outo aksesibel pa ròlstùl nobo pa siguí transportá mas hende den ròlstùl na Kòrsou via e servisio di transporte di Fundashon Alton Paas ku yama Wheelee.
Dia 5 di mei ultimo Rotary Club Willemstad a organisá su ROTA FUN(D)RIVE ku tabata un ‘speurtocht’ den auto kaminda un òf mas persona por a registrá su grupo pa buska diferente lèter ku sifra i asta hasi tareanan riba diferente kaminda strategiko rònt Kòrsou pa na final a bin kulminá na e establesimentu di Pasawá riba Caracasbaaiweg.
E inisiativa aki a hala varios spònsòr i grupo di partisipante ku a logra yega na un donashon substansial ku lo aportá na mitar
di e gastunan pa e outo nobo pa Wheelee. Esaki ta un logro imenso. Danki na tur esnan ku a kere den Rotary Club Willemstad i alabes e kousa pa siguí hasi Kòrsou mas inklusivo.
Rotary Club Willemstad a selektá e proyekto Wheelee di Fundashon Alton Paas pa aportá na baha e barera di transporte aksesibel na Curaçao. Ya asina ku hendenan den ròlstùl òf ku difikultat pa kana tambe por hasi karedanan sosial. Esaki ta karedanan pa bai bishita famia, bai misa, bai un sine, bai diskotek òf konsierto, bai un weg’i bala, ègt e kosnan dushi di bida ku un persona ku desabilidat tin derechi di disfrutá di dje meskos ku kualke otro persona.
Fundashon Alton Paas ke gradisí tur spònsòr, partisipante i spesialmente Rotary Club Willemstad ku a organisá esaki. Laga nos sigui traha huntu pa siguí baha e barera di transporte aksesibel pa yega na un Kòrsou inklusivo.
