Un dia di elekshon ku a bira un dia tragiko

Tabata un mainta riba dia di elekshon na aña 2003 banda di 10or di mainta. Nos tres amigu, bisiña banda di kas a sali pa bai dal un keiru. Nos tabata koriendo na ser’i domi direkshon pa brùg. Ami sinta patras na e banda rèks den auto. Nos tabata koriendo duru si pero nos a lora ke bògt na rèks nèt promé ku bo subi brug pa bai direkshon di Rif. Drentando e kaya ei, riba e speed ku nos tabata bai, e auto a man’e pasa riba algu den e kaya i mesora auto a pérdè kòntròl kai den skwal.
E auto a keda zwaai te dal den vangreel. Ma bai purba rèk dilanti pami tene na e lomba di stul mi dilanti paso no tatin faha patras den auto. Sin ku mi sa, mi a habri wowo mira shelu. Ma purba move mi mes, ma purba lanta pero nada i einan ma realisa ku tin kos grave a sosodé kumi.

For di e dia ei tur kos a kambia
E dia ei tabata 9 di mei 2003 ku mi a haña un dwarslaesie. E tempu ei mi tabata bayendo LTS cas cora ku e idea pami kaba skol bai traha na isla of Doc komo “Laser”. Pero for di e dia ei tur kos a kambia.
Mi a bira kompletamente dependiente di otro hende, hopi kos mi’n por hasi manera antes. Mi tabata gusta bai mondi, kana den naturalesa, yag, bai laman i piska pero tur e kos nan ei no ta por mas.
E tempu ei ora bo haña dwarslaesie bo ta bai Mgr. Verriet pa rehabilitá, despues bo ta bai kas, kisas bo ta haña chens tòg pa bai algun terapia. Despues un tin nada mas. Dus bo ta keda na kas i ku bo kurpa ta keda bai atras. Paso nos ku ta asinaki mester keda move.

Mi a kuminsá haña mas forsa
Dia mi a topa ku Fundashon Alton Paas ku ami, Alton i Steven bai merka, e ora ei e kos a kuminsá. Mi a kuminsá mira mihó kambio. For di einan mi a mira ku mi a kuminsá haña mas forsa, mi a gana mas peso, haña mas muskulo. Mi por a kuminsa transfer dimi ròlstul pa kama i tambe mi buikspier a bai dilanti. Asta mi a ripara sierto momentu ku mi mes por a hasi sierto moveshon ku mi pia.

Despues ku nos a bin korsou nos a sigui hasi ehersisio te awor tin AP Center ku mi ta baiendo gym na AP Center. Mi a logra bai un proyekto mas di ABT si i esei ta hopi bon mes pero semper nèt ora e proyekto tei kaba mi ta sinti e kambio. Kambionan manera ku mi por kore mi ròlstul mihó, mi ta kuminsà sinta mas stabil den mi ròlstul i asta mi sistema digestivo a mehorá. E proyektonan asina ta yudami bai ABT ku ta meskos ku na merka paso riba mi mes min por kubri e kostonan.

Train un kaminda ketu ketu tampoko no te kos
E loke ku mi ta gusta mas di AP Center ta e ambiente. Ora mi bai einan mi ta topa mas hende. Nos ta papia hasi wega ku otro. Nos ku ta den ròlstul tin bia ta sinta na kas, bo ta sintibu laf, kisas bo ta bo so. Kiermen ora bo bin akinan bo ta topa mas hende. Bo ta papia i hari ku e otro klientenan òf e trainernan mes. Tin un kliente ku tur bia ku mi yega ora e tei e ta bira bisa: ‘ya, tur e mashin nan a kue awa’ paso kasi tur mashin mi ta subi. Ora e yega mi tambe ta bis’é un kos prèt.
Kiermen asina nos ta papia, kòmbèrsá i hasi prèt. Bo ta pone atenshon na e parti sosial tambe tanten bo ta train.
Asta ku e trainernan tambe nos ta kombersá. Mi ta sinti ku esei ta yudami train mas dushi tambe paso pabo bai train un kaminda ketu ketu tampoko un t’e kos. Pesei mi ta sintimi bon ora mi bin train, trainernan ta yudami bon, guiami, motivami pami train i ratu ratu nos ta papia nos kosnan prét i asta riba diferente otro topiko.

Kiermen aworaki ku tin AP Center tin un kaminda kubo por bin train hasi gym òf ABT. Ami tabata gusta e 4 bia pa siman 2 ora ku bo ta mira mas kambio. Esei tabata na merka. Aworaki mi ta bin 2 bia pa siman 1 ora.

E mashin ku mi ta gusta mas tantu ta e ‘UpperTone’. Einan bo por train mayoria kos. Chèst, skouder, bisèp, trisèp. Pero tur mashin mi gusta si.

Tatin un guy mes ku e aña aki mi a konose via un otro bro. Mi tabata splik’é kiko a pasami i tur e kosnan ku mi ta hasiendo. Despues mi a tende ku e mes a haña dwarslaesie dor di un aksidente ku auto. Mi no tabata sa kon su situashon tabata. Pero ma bise si ku ami ta bin train na AP Center, pa e buska informashon paso bo keda kas sin hasi nada bo kurpa ta bai atras. Despues nos a haña kontakto i e mes a bisami ku ela kuminsá ABT aki na AP Center. Kiermen esei ta bon si, ma bis’é tambe p’é dal bai p’é keda kla.

Mi ta bin hasi mi kos pami keda kla
Den e promé añanan despues dimi aksidente bo ta kibra ratu ratu pero despues e ta gewoon kita. Awoki nòrmal mi ta biba. Tur kos ta nòrmal, m’a kustumá i bida ta sigui i mi ta bin train pami keda kla, mantené e kondishon paso si mi stòp, kurpa ta bai atras òf lo mi tinku train na kas pero na kas e no ta fasil paso mi mester di yudansa. Kiermen mi ta sòru pa semper mi bin. A ni e weer òf un bon pal’i awa. Si mi por, mi ta bin. Ta algu grave mester pasa òf mi ta malu òf si mi haña un herida fèrfelu. Si no, mi ta bai hasi mi kos pami keda kla.
———

 

Esaki tabata testimonio di Jurvis Lourens di su eksperensia na AP Center. Si abo tambe ke mas informashon di AP Center bo por tuma kontakto ku nos libremente dor di yama òf whatsapp nos na 5100087