E diferensia entre AP Center i sentronan di rehabilitashon

Na Kòrsou tin diferente organisashon pa yuda personanan ku un desabilidat. Kada un ku su bentaha i desbentahanan. Kada unu a prueba nan derechi di eksistensia i e impakto ku nan tin riba bida di personanan ku un desabilidat.

Meskos AP Center tambe tei spesial pa yuda personanan prinsipalmente ku a haña un paralisis dor di un aksidente òf malesa. AP center ta brinda e posibilidat pa e persona ku tin un paralisis por bin hasi ehersisio den un ambiente adaptá na su kondishon. Pesei hopi bia e ta keda kompará ku un sentro di rehabilitashon pa e persona por bai rehabilitá.

Via e blòg aki por mira e diferensia entre AP Center i un sentro di rehabilitashon ku bo por haña un idea kon nan ta komplementá otro.

 

Meta
Hopi bia ora un hende kuminsá ku rehabilitashon e meta ta pa yuda e hende bira mas independiente posibel basa riba su situashon na e momentu ei. Dus si e mester siña bisti paña, kore ròlstul, baña, bai trabou, loke sea. Basá riba esei ta krea un plan pa yud’é alkansá e metanan ei, sea ku ta dor di ehersisio fisiko, okupashonal òf adaptashonnan spesial ku por yuda e hende bira mas independiente posibel den su situashon.
Na momentu ku un hende kuminsá na AP Center e punto di salida ta ku e kurpa ta trahá pa move. Pues den un ambiente adaptá ta hinka e kurpa den moveshon ku e meta pa mantené tur loke ela logra den rehabilitashon i tambe ku e por sigui bai mas dilanti.

 

Tempu
Sientifikamente a keda pruebá ku den e promé 6 lunanan despues ku un persona haña un paralisis e tin mas chèns pa rekuperá. Esei ta nifiká ku ora e persona yega un sentro di rehabilitashon, sigur si ta resien despues di e momentu ku ela haña su paralisis, ta krea un plan i ta kontrolá e tempu ku e ta dura pa rehabilitá. E idea ta pa logra alkansá mas tantu den menos tempu pasobra e hende no ta keda rehabilitá pa hopi lunas nan largu.
Na AP Center e pensamentu ta ku e kurpa mester keda den moveshon speshal pa mantené e kurpa flèksibel, fuerte i tambe evitá komplikashonnan mediko. Meskos ku e hende ta baña tur dia, sea wak tv òf skucha radio tur día, ehersisio tambe ta forma parti di su rutina. Pues no tin un limité na kuantu luna e persona ta keda hasi ehersisio. Loke si ta importante ta e balansa pa e ehersisionan keda akompañá ku bon nutrishon i sosiegu pa mihó resultado.

 

Fase
Ora un hende haña un dwarslaesie òf ataka selebral, e ta bai hòspital pa duna e kurpa e asistensia mediko pa stabilisá, depende di kon e kurpa ta, e ta bai un sentro di rehabilitashon òf terapia serka un terapista fisiko. Na momentu ku e kaba ku esei e ta bai AP Center.
AP Center por ser konsiderá komo un ‘nazorg’ despues di su fase di rehabilitashon i terapia. Pesei na AP Center un persona ta bin trein i hasi ehersisio, no terapia òf tratamentu. Eseinan ta dos kos distinto. Terapia òf tratamentu, eseinan ta sosodé serka un terapista pero na AP Center e persona por apliká pa un programa pa trein i hasi ehersisio.

 

Ekspertisio
Na momentu ku un persona kuminsá su rehabilitashon e ta haña terapistanan i profeshonalnan ku ta yud’é ku su rehabilitashon manera terapista okupashonal, sikologo, terapista fisiko, logopedista i un dòkter rehabilitadó. Nan huntu ta sinta atende bo progreso i pone metanan pa asina saka lo maksimo di bo rehabilitashon.
Na momentu ku bo kuminsá ku AP Center, bo ta haña hendenan ku diferente konosementu di deporte, salu i bienestar, anatomia di kurpa i ku sertifikashon di Activity-Based Training. Depende di e programa ku bo kuminsá kune bo ta haña, sea un asistente of treiner pa yudabu saka lo maksimo di bo ora basa riba e meta ku abo a pone pabo mes..

 

Durashon di seshon
Na un sentro di rehabilitashon òf terapia e stàndarte ta ku bo ta haña 30 minüt di terapia. Esei ta loke seguro ta kubri pa seshon di terappia.
Na AP Center kada seshon ta un ora. Ta tene kuenta ku tin bia hopi tempu ta bai na prepará e persona sea den un ekipo òf ku asesorionan pa hasi ehersisio. Dor ku ta pone atenshon na hinter e kurpa apesar di e areanan ku no tin moveshon boluntario ta duna espasio pa hasi mas den un ora asta si tin sierto muskulonan ku ta kansá kaba.

Gastunan
Mayoria terapista òf sentro di rehabilitashon ta kubrí pa seguro mediko. Pues ora un persona pidi un ‘verwijsing’ dor di tin sierto keho i mester di tratamentu, e ta haña esaki kubri pa su seguro.
Na momentu ku e persona ke kuminsá na AP Center, e no mester di un ‘verwijsing’ i e mes mester paga pa e programa ku e apliká pe paso e programanan ahinda no ta kubrí pa seguro. Sinembargo promé ku kuminsá na AP Center semper ta bon pa konsultá ku bo dòkter di kas promé ku apliká pa un programa di ehersisio. Esaki pa bo sa si no tin niun kondishon sekundario ku por afektá bo desaroyo na AP Center i ku mester tene kuenta kuné.

Esaki ta duna e persona un bista di e diferensia entre AP Center i un sentro di rehabilitashon. Ku e meta pa trese klaridat kiko kada un por nifiká pa abo òf bo ser kerí ku tin un paralisis. Tur dos tin su bentaha ku su desbentahanan i tur dos ta komplimentá otro.