Pa bai dilanti mester #Move
Dia 8 di mart 2020 ta dia pa #Move durante The Annual Fitness Challenge na International School
WILLEMSTAD, Atrabes di añanan mas i mas persona ta skohé di partisiá na e Annual Fitness Challenge di Fundashon Alton Paas. E Annual Fitness Challenge ta e evento di fundraising mas grandi di Fundashon Alton Paas pa por sigui yuda personanan ku un paralisis na Kòrsou ku ehersisio i transporte. Kada aña – ku un mensahe speshal – Fundashon Alton Paas ta motivá rònt Kòrsou pa move. Pesei pa aña 2020 a skohe e hashtag #Move pa karga e kampaña pa e proksimo Fitness Challenge.
Dia 8 di mart 2020 lo ta e di 7 edishon di the Annual Fitness Challenge. The Annual Fitness Challenge ta un evento di 6 ora largu ku diferente aktividatnan di moveshon. Tin e kaminata di 5 i 10km ku ta kuminsa i kaba na International School. Tin e area di spinning ku grupo por registrá pa haña un spinbike pa komo grupo spin e total di 6 oranan. Tin e area di fitness mes ku den sala ku diferente seshon di fitness manera Zumba, Yoga i hopi mas, kada unu 45 minüt tras di otro.
Tur esaki ta pa yega na fondonan nesesario ku Fundashon Alton Paas por logra sigui yuda via programanan di ehersisio, transporte aksesibel i diferente proyekto mas pa mehorá e kalidat di bida di e personanan ku dwarslaesie i otro problemanan neurologiko ku ta kousa un paralisis. Nos ta biba den un komunidat ku na momentu ku un persona haña un dwarslaesie, e ta bai hospital i pa despues e bai rehabilitá. Despues ku e rehabilitá i e 
bai kas, einan e ta kuminsá konfronta retonan manera aksesibilidat, transporte i asta falta di rèspèt. Ku kada dia ku pasa e ta bira vulnerabel pa komplikashonnan mediko speshalmente si e ta limitá na moveshon fisiko dor di su paralisis. Tur esakinan por kousa isolashon di diferente persona ku no tin e motivashon òf kurashi pa sigui pa dilanti.
Ora nos wak bèk, nos ta rekonosé ku pa tur persona sea ku dwarslaesie òf su famia òf kualke suidadano bai dilanti, nos tur mester move. Esei tambe e di 7 edishon di the Annual Fitness Challenge ta enfoká riba dje. Pa nos tur #Move. Pa asina krea alaves e sentido di inklushon ku nos tur por move huntu i tambe move pa esnan ku no por pa motibu di ta sufri di un paralisis.
Meskos ku añanan anterior e yamada ta bai na tur suidadano pa move huntu ku nos dia 8 di mart 2020 na Internashonal School. Abo por move pa esnan ku no por i yuda pa mas hende por bai dilanti. Karchinan ya ta obtenibel na puntonan di benta Mensings Caminada, Samsom Colon, Van Den Tweel Zeelandia i tambe online riba nos website www.fundashonaltonpaas.org pa kualke informashon adishonal semper por bèl of manda un whatsapp na 5100087.
