3 Organisashon a uni forsa riba dia internashonal di personanan ku desabilidat
pa bai organisa e promé feria pa selebrá nos abilidatnan otro aña 3 di desèmber 2020
WILLEMSTAD, Fundashon Totolika, Fundashon Pro Bista i Fundashon Alton Paas a bini huntu awe 3 desember 2019 pa start ku preparashonnan pa organisá un evento nashonal pa selebrá e abilidatnan di personanan ku un desabilidat na Kòrsou.
E esfuersonan pa yuda personanan ku un desabilidat na Korsou ya tin basta tempu ta kanando. Kuminsando na aña 1978 a lanta e fundashon ‘Council for the handicapped (stichting ter rehabilitatie van Gehandicapten)’ riba rekomendashon di Norman Philip di ILO, invitá dor di Minister Spencer.
E tabata konsistí di siguiente miembronan Sosiedat di siegunan, Hulp aan Auditief Gehandicapten,Totolika, Fuphafi i SGR.
Na 2004 a disidí di kambia di un Fundashon pa un Federashon ku a yama Fedemakro. Na e federashon aki fundashonnan di malesanan króniko tambe a afiliá. Kada organisashon ku nan meta i grupo di enfoke pa yuda i sostené atraves di diferente forma.
Banda di e esfuersonan ei a bini diferente organisashon mas ku ta traha pa personanan ku un desabilidat. Manera Handicaps Rights Foundation, Sentro Solaris, Fundashon Alton Paas i diferente mas.
Pesei mas i mas e importansia di traha huntu i uni forsa pa un impakto mas grandi. Ku esaki den mente Fundashon Alton Paas, Fundashon Pro Bista i 
Fundashon Totolika a uni forsa pa bai organisá un feria ku tur e organisashonnan ku ta traha ku personanan ku un desabilidat. Esaki ta pa logra mustra e trabou ku nan ta hasi i kiko tur ta posibel pa personanan ku un desabilidat na Korsou. Alabes tambe lo duna oportunidat na personanan ku tin un desabilidat ku sea ta krea un produkto òf servisio por mustra loke nan ta hasi i kiko nan por.
Awe 3 di desember 2019 Fundashon Alton Paas, Fundashon Pro Bista i Fundashon Totolika a hasi e kick off meeting pa palabrá e promé pasonan ku lo bai tuma pa kristalisá e idea aki pa asina otro aña 3 di desember 2020 nos por tin un feria eksitoso selebrando e abilidatnan di personanan ku un desabilidat na Kòrsou.
potretnan saka pa Pluz Marketing & Multi Media