Willemstad, 4 Novèmber 2019 KOMUNIKADO DI PRENSA
Reservá e fecha 8 di mart 2020
pa e di 7 edishon di The Annual Fitness Challenge
WILLEMSTAD, Dia 8 di mart 2020 lo tin e di 7 edishon di the annual fitness challenge. Esaki ta e fundraising mas grandi organisá pa Fundashon Alton Paas ku ta yuda trese fondonan pa sigui yuda mas hende ku ta sufri di dwarslaesie I otro problemanan neurologiko.
Ora un persona haña un dwarslaesie e ta bai hòspital pa e haña tratamentu I despues di esei e ta bai un sentro di rehabilitashon pa prepará pa bai bèk kas mas independiente posibel. Na momentu ku e yega kas bèk despues di su aksidente, e ta hañ’e konfrontá ku diferente retonan manera transporte, aksesibilidat, moveshon i asta rèspèt. Kosnan ku pa un persona ku niunka no a haña un desabilidat fisiko no ta ni paga tinu na dje. Ku kada dia ku pasa e persona ei ta bira mas vulnerable pa haña otro komplikashonnan mediko vooral door di tiki moveshon i isolashon den kas.
Kada aña ta bin un grupo di persona ku ke hasi un diferensia den bida di e personan aki i ta skohe pa reta nan mes den e 
aktividat di moveshon aki pa move pa esnan ku no por.
Pesei the Annual Fitness Challenge a bira mas ku un fundraising. Aworaki e ta atrahé tur tipo di persona ku kada un ku abilidatnan distinto pa huntu mustra kon inklusivo nos por ta komo komunidat i tambe ku nos tur huntu ta benifisia di moveshon. Pesei den e di 7 edishon aki lo ta aun mas impaktante.
E fitness challenge ultimo a krea fondonan ku a yuda ku diferente kos durante 2019. Esakinan ta entre otro pa personan ku mester a hasi uso di Wheelee ku ta un transporte aksesibel pa transporta personan den ròlstul. E fondonan a yuda personan ku un paralisis bira mas fuerte i salu via AP Center ku ta e lokalidat di ehersisio pa personan ku ta sufri di un paralisis.
Pues kada persona ku prepará pa e sigiente fitness challenge ta prepará pa kambia bida di hende, ta prepará pa reta su mes pa move pa esnan ku no por. Keda pediente riba nos facebook page di Fundashon Alton Paas paso nos lo bai anunsia e mensahe ku nos ke trese dilanti durante e kampaña pa yega e di 7 edishon di The Annual Fitness Challenge ku lo ta dia 8 di Mart 2020.