Un Kòrsou Aksesibel

ta atendé un averahe di 40 pa 50 pasahero pa dia ku ta usa ròlstul via aeropuerto hato

WILLEMSTAD, Fundashon Alton Paas ta hopi kontentu i agradesido pa e sosten i partisipashon na konferensia Kòrsou Aksesibel. Durante e konferensia señor Miles Mercera di Chata a informá ku tin un averahe di 40 pa 50 persona ku ta pasa aeropuerto di korsou ku ta pidi asistensia spesial di ròlstul door di tin difikultad ku mobilidat. Pues e konferensia tabata di balor pa tur persona i organisashon por a haña informashon, eksperensia i interkambiá riba e aspektonan di aksesibilidat pa e diferente kondishonnan ku ta biba den nos komunidat.

Dia 13 sèptèmber na Avila Beach Hotel tabatatin e konferensia Kòrsou Aksesibel ku por a konta ku 8 orador ku a presentá e diferente aspektonan ku tin di haber ku aksesibilidat pa ku e diferente desabilidatnan fisiko. A papia tokante adaptashonnan i hèrmèntnan pa por yuda personanan ku difikultat ku bista, oido i tambe mobilidat. Ademas tambe por a haña un tiki eksperensia ku e brelnan di demonstrashon ku a pasa rònt pa mira kon un hende ku sierto problema ku bista ta wak. Un di e momentunan impaktante tabata na momentu ku a laga algun partisipante sinta den ròlstul i kore den hotel Avila pa wak kiko ta e kosnan ku e hende sinta den un ròlstul ta eksperensia. Un punto masha signifikante ta ku segun datosnan ku CHATA a risibi ta indiká ku pa dia tin un averahe di 40 pa 50 persona den ròlstoel ku ta drenta òf sali Kòrsou. Datosnan ku por hasi nos konsiente di e oportunidat ku tin nos dilanti si nos ke sigui eksplorá alternativanan pa mehorá ekonomia di Kòrsou. Ademas tambe ta lanta e pregunta kon prepará nos komo pais ta pa risibí mas di e grupo di enfoke ku tin bia ta asta biaha ku kacho di asistensia pero no ta asina komun na Kòrsou ku un persona ta drenta tur kaminda ku su kacho pa asisti e persona den un establesimentu.

Manera ya indiká e konferensia tabata konsistí di un parti pa empresa durante dia i parti atardi tabata pa komunidat en general ku a konta ku diferente hende den ròlstul ku a partisipá i tambe nan famia. E parti aki tambe a konta ku topikonan relevante di bibienda aksesibel i e invalide parkeerkaart ku ainda ta den espera di ehekushon di esaki. E parti mas impaktante pa e anochi aki tabata e momentu di interkambio kaminda partisipantenan a keda repartí den grupo i kada grupo mester a trese dilanti kiko nan ta eksperensiando, kosnan ku nan ta sinti por mihó i tambe kosnan ku ta bayendo bon. Esaki a trese un interkambio entre oradornan tambe pa wak posibel solushonnan pa por sigui mehorá aksesibilidat na Kòrsou. Sigur representante di VVRP, BPD/Kranshi i FKP a haña tipnan balioso pa evalua. Por a konkluí ku e dia kompletu tabata eksitoso i tambe ta mustra e nesesidat di informashon, komunikashon i kolaborashon pa por alkansá na traha huntu i mehorá aksesibilidat na Kòrsou.

Pa tur esnan ku ainda no a download e guia pa mehora aksesibilidat por hasi esaki via website di Fundashon Alton Paas www.fundashonaltonpaas.org òf tuma kontakto ku Fundashon Alton Paas na 5100087.