WILLEMSTAD, Manera ya ta konosi dia 13 di sèptèmber awor kuminsando 9’or di mainta lo tin e konferensia Kòrsou Aksesibel. Ku hopi gratitud Fundashon Alton Paas ta anunsia ku Avila Beach Hotel ta un di e spònsernan i alaves e sitio ku lo karga hinter e konferensia aki pa ekipá abo pa hasi bo luga aksesibel.
Avila Beach Hotel ya ta konosi di ta pone atenshon na aksesibilidat te ku e hotel aki a risibi e premio di e hotel mas aksesibel via di e Curacao Inclusion Award na aña 2017. E tempu ei a hasi un audit di mas ku 30 hotel na Kòrsou ku ta miembro di CHATA pa wak kua ta kumplí ku mas tantu di e eksigensianan pa ta aksesibel. Pesei pa e konferensia aki, Avila Beach Hotel a kontribuí netamente pa sigui promové aksesibilidat. Alfinal ta nos tur ta benifisiá na momento ku Kòrsou bira mas aksesibel.
E konferensia lo start ku e topiko di aksesibilidat visual presentá pa un representante di Zorg en Welzijn Groep Bonaire. Señor Miles Mercera di CHATA ta papia tokante Turismo Aksesibel. Lo tin tambe señor Gerald Rosina di Obranan Publiko ku lo bai papia tokante di un investigashon ku a keda hasi na 2014 tokante di aksesibilidat den sentro di suidat i tambe kiko ta keda hasí na infrastruktura pa ku aksesibilidat atraves di e departamento di Obranan Publiko. Wèbsait Aksesibel lo keda presentá pa Jeff Macolonie di Profound Projects. Asina tin diferente topiko mas ku ta riba programa. Aworaki nos huntu tin e oportunidad pa krea e infrastruktura pa mas persona ku ta forma parti di nos komunidat por logra partisipá aktivo i usa nan abilidatnan pa kontribuí na nos komunidat.
Fundashon Alton Paas ta konsiderá aksesibilidat komo e medio pa haña akseso na nos abilidatnan. Esei ta nifiká haña mas 
kliente, mas kolega, mas turista, mas oportunidat. Pesei e konferensia aki ta di sumo importansia i ku lo sirbí komo un vehikulo pa nos por kuminsa e biahe pa oumentá e potensial di Kòrsou atrabes di e kapasidat humano ku ta biba den nos pais. Nos tur ta konta i ta huntu nos por logra kuminsando na mehorá aksesibilidat na Kòrsou pa asina nos por tin mas man na obra.
Pa mas informashon òf pa registrá mesora por subi nos wèbsait www.korsouaksesibel.com. Riba nos wèbsait tin 3 forma di pago, esta via nos wèbsait mes ku bo credit card, por hasi pago via wire transfer di banko òf cash na nos sentro den Winkel centrum Colon unit 4. Despues di bo pago nos ta konfirmá bo partisipashon. Registrá awe mes pa abo tambe hasi Kòrsou aksesibel. #korsouaksesibel