Willemstad – Fundashon Alton Paas a presentá un guia pa mehorá aksesibilidat na Kòrsou dia 28 di sèptèmber 2018 durante e di ‘3rd Caribbean SCI Congress’ na Santa Barbara Beach & Golf Resort. E manual a keda entregá na ministernan presente, Minister di SOAW, sr. Hensley Koeiman, Minister di MEO, drs. Steven Martina, Minister di VVRP, sra. Zita Jesus-Leito i dr. Keli, representando Minister GMN sra. Suzy Camelia-Romer.
Un aña pasa, na 2017, Fundashon Alton Paas a tuma e inisiativa pa midi kon aksesibel Kòrsou ta i a publiká e rapòrt “Curaçao Inclusion Project: Accessibility Research and Audit Report”. Ophetivonan di e auditoría tabata pa: 1) Evaluá aksesibilidat i uso di fasilidatnan públiko pa usuarionan di ròlstul; 2) Pa evaluá e fasilidat ku un persona ku desabilidat por maneobrá den fasilidatnan públiko; 3) Pa traha un lista di establesimentunan ku ta aksesibel konforme stándartnan establesé; 4) Pa rekonosé esnan ku di inisiativa propio a hasi nan establesimentunan aksesibel; 5) Pa peilu si dunadónan di trabou ta habrí pa e idea di empleá usuarionan di ròlstul i hasi nan establesimentu òf lugá di trabou aksesibel. Den e rapòrt aki a konkluí, entre otro, ku na Kòrsou no tin maneho riba área di aksesibilidat, i no tin informashon kiko ta hasi e infrastruktura aksesibel, pa hendenan ku desabilidat. E pokonan ku a skohe pa hasi nan establesimentu aksesibel a hasi esaki konforme nan propio huisio i persepshon.
Sinembargo e nesesidat pa aksesibilidat konforme stándartnan aprobá internashonalmente ta keda un nesesidat.
E tratado di Nashonnan Uní, ku ta promové Derecho di Personanan ku Desabilidat, ta indiká, ku opstákulonan ku personanan ku desabilidat ta topa, mester keda eliminá pa asina sigurá ku e grupo aki tambe tin partisipashon igual den tur aspekto di desaroyo sosial. Pues aksesibilidat no ta un luho pa personanan ku limitashon. Pa e motibunan aki, tin rekomendashon den e rapòrt pa bini ku implementashon di maneho, pa mehorá aspektonan di aksesibilidat spesialmente den áreanan i lokalidatnan públiko.
Den nos afan, pa duna kontenido na e rekomendashonnan, Fundashon Alton Paas a instalá un komishon pa traha riba un 
stándart di Reglanan di Aksesibilidat pa Kòrsou. E komishon a keda formá pa Godalys Reina, direktor athunto di Pro Kuido NV., Noemie Panneflek-de Lannoy, arkitekto i Maaike Versteeg, ergoterapista, ku a enkabesá e komishon i tambe ku a presentá e dokumento aki den e programa di e kongreso.
E kolaborashon entre e komishon, diferente entidat di interes, i Fundashon Alton Paas a redundá den e manual “Richtlijnen voor betere toegankelijkheid op Curacao” òf Guia pa mihó aksesibilidat na Kòrsou. E dokumento a tene na kuenta 3 aspekto di aksesibilidat ku ta 1) Fasilidat pa yega i drenta e edifisio (Toegankelijkheid); 2) Fasilidat pa maneobrá den e edifisio (Doorgankelijkheid) i 3) Fasilidat pa hasi uso di e espasionan i fasilidatnan den e edifisio (Gebruikelijkheid). Den e dokumento a hasi uso di splikashon detayá pa kada área, hasiendo uso di midínan konforme stándartnan internashonal. Pa por hasi e splikashon mas kla a agregá ilustrashon, ku midí. E manual ta e promé edishon.
Ta e intenshon pa Fundashon Alton Paas keda revisá e guia aki periódikamente, update e ku informashon relevante i aktual, i aktualisé ku mas aspektonan di aksesibilidat ku ta relevante pa Kòrsou. Ta importante remarká ku sin e sosten di públiko, entidatnan di interes, i departamentunan gubernamental, enkargá ku maneho di Desaroyo di Infrastruktura i Desaroyo Soshal, e inklushon deseá pa personanan ku limitashon no ta posibel!!!
Ya ta asina ku SGR Groep i Fundashon Pro Bista ta e promé dos organisashonnan ku tambe a firma pa rekonosé e guia aki komo e promé stap pa mehorá aksesibilidat na Kòrsou. P’esei nos ta boga pa e manual aki keda distribuí i bira un dokumento di referensha ora ta hasi planifikashon pa kambionan di infrastruktura.
Defakto, ta nos deseo pa Gobièrnu di Kòrsou adoptá e guia aki i bira usuario number unu, birando asina un modelo regional. E manual aki ta aksesibel grátis pa download via nos website https://fundashonaltonpaas.org/richtlijnen-toegankelijkheid/