The Annual Fitness Challenge T-shirt Pickup
Dianan 28 februari, 1, 2 i 3 di mart 2018 na lokalidat di Fundashon Alton Paas na Winkelcentrum Colon
WILLEMSTAD, Djadomingu proksimo, 4 di mart 2018, e di 5 edishon di The Annual Fitness Challenge. Manera tur aña e evento ta tuma lugá na International School. Fundashon Alton Paas ta kla pa start ku registrashon i repartishon di T-shirt.
Danki na koperashon di diferente instansia, Fundashon Alton Paas ta kla pa e di 5 edishon di The Annual Fitness Challenge. Dianan 28 di februari, 1 i 2 di mart 2018 durante oranan di 4’or atardi pa 7’or anochi ta registra i parti T-shirt na lokalidat di Fundashon Alton Paas na Winkelcentrum Colon. Riba djasabra 3 di mart di 10’or di mainta pa 3’or di atardi tambe por pasa pa buska T-shirt i registra. Tur persona mester presentá ku nan karchi. Pa esnan ku mester kumpra karchi por hasi esaki na Samsom Colon, pasa Fundashon Alton Paas pa registra i tuma bo T-shirt.
Manera informa por haña karchi na Mensing Caminada, Van den Tweel Zeelandia, Samson Colon. Aktualmente por haña karchi tambe na Body Beach Wellness Club, Avila Wellness Club i Oxygen Fitness Curaçao.
The Annual Fitness Challenge ta e fundraising anual di Fundashon Alton Paas. Fondonan rekouda ta sirbi pa kubri ehersisionan intensivo i transporte pa personanan ku dwarslaesie, stroke (CVA) òf otro situashonnan neurologiko.
Fundashon Alton Paas ta invitá komunidat, kompania òf gruponan pa forma nan tim i partisipá na e di 5 edishon di Fitness Challenge pa huntu nos #UniDenMoveshon.