Willemstad, 10 september 2017
Klousura di Curaçao Inclusion Project di Fundashon Alton Paas kaminda a pone atenshon na asesibilidat pa personanan ku ta usa ròlstul
WILLEMSTAD, Fundashon Alton Paas ta hopi kontentu i agradesido pa e sosten i impakto di e promé Curacao Inclusion Award. Huntu ku su partnernan CHATA i CTB Fundashon Alton Paas ta duna mas nifikashon na asesibilidat i inklushon na Kòrsou. Djabièrne anochi ultimo a tuma luga e programa di klourura ku a konta ku presensia di 3 minister, un sala yen ku a pasa dor di un anochi emoshonante i inspirativo ku na final e tan famoso show di Randal Corsen i su orkesta.
Por konsiderá e di tres fase di e proyekto Curacao Inclusion Project di Fundashon Alton Paas un eksito. Djabierne anochi ultimo a start e programa ku un wheelchair challenge pa e invitadonan speshal. Ministernan presente i algún persona mas a bai e challenge dor di kore den ròlstul di resepshon te na entrada di e sala riba un tapeit ku ta eksigí algu èkstra di e persona den ròlstul. E programa ofishal a start ku palabranan di Alton Paas mes ku a pone atenshon na 5 aña di eksistensia di Fundashon Alton Paas. E nesesidat ku a mira durante e 5 añanan pa e personanan den ròlstul por ta mas aktivo den komunidat ta asesibilidat. Pesei a skohe pa pone atenshon na esaki.
E orardor pa apertura di e anochi tabata Minister di M.E.O, drs. Steven Martina ku a rekonosé e potensial di ta inklusivo i a komprometé di lo inklui e aspekto ei tambe den e ministerio. Despues a presentá e making di e promé Curacao Inclusion Award dor di señor Francis Sling, un di nos artistanan masha konosí.
A sigi ku palabranan di Maaike Versteeg kual tabata e Ergotherapeut ku a kordiná e audit indikando ku e meta di un ergotherapeut ta pa guia un kliente pa bira mas independiente ku ta posibel. E kliente por tin un limitashon di kualkier forma pero e meta prinsipal ta independensia. Pesei e topiko di e anochi aki ta algu importante i ku nos tur mester atendé proaktivo i no solamente pasombra Fundashon Alton Paas a hinkele den un bachi atraktivo. Ta e derechi di tur hende, dus tambe hendenan den ròlstul, pa keda inkluí den komunidat i ku nan por drenta i usa establesimentonan.
Pesei señora Versteeg huntu ku un par di kolega ergotherapeut a sostené e inisiativa aki i a uní ku Fundashon Alton Paas. E konklushon di e audit ta ku niun establesimentu no a kumplí 100% ku e eksigensianan basiko di asesibilidat for di e Integrale Toegankelijkheids Standard di Hulanda. Algun di e puntonan ku a skohe pa evaluá tabata luga di parker pa hende den ròlstul. Tin un bòrchi pa indika esei? Kua midi e luga di parker tin, pasombra e mester ta mas hanchu pa e ròlstul por para banda di auto. E ròlstul por subi stupi pa yega na entrada? E entrada tin drèmpel, òf un subida ku ta sufisiente largu pues no ta muchu steil? Tin un lift ku e hende den ròlstul por drenta i hasi uso di dje su so? Tin un tualèt ku un ròlstul por drenta, ku beugel? Ku un labamano ku e ròlstul por kore i bai bou di dje? E kliente por wak den spil? Den un restuarant e kliente por sinta komodo na un mesa? Algun luga a hasi sierto adaptashon si pa risibi hendenan den ròlstul. Pues awor ku lo bai entrega e rapòrtnan nos ta spera ku kada establesimentu bai mas profundo den e topiko i hasi algu na dje.
Señor Miles Mercera di CHATA a duna palabra tambe i a ekspresa ku awor a mira kiko asesibilidat i inklushon por nifiká pa Kòrsou ku nos por bira e isla den Karibe mas asesibel. Despues di e speech sr Mercera a anunsia e Most Accessible Hotel kual ta Avila Beach Hotel.
Fundashon Alton Paas a pasa un video di asesibilidat kaminda un persona den ròlstul mester kore riba kaya riba su ruta pa trabao i visa versa koriendo un peliger. Despues di esaki señora Minister Zita Jesus-Leito a bini dilanti i a bisa ku a aserka su ministerio pa atendé e situashon aki. Sra Minister Jesus-Leito a mustra e importansia i kompromiso di su ministerio pa krea kambionan nesesario pa Kòrsou por ta mas asesibel. Despues di esei Minister Jesus-Leito a anunsia e Most Accessible Restaurant kual ta Nautilus Restaurant na Renaissance Hotel.
Pa e ultimo rekonosementu Alton Paas mes a entregá esaki despues ku Kòrsou a vota pa e dunadó di trabou ku tin un persona den ròlstul den servisio. Komunidat por a vota entre 4 dunadó di trabao kual tabata Seawings NV, Kinderoorden Brakkeput, IBIS Management i Biblioteka Nashonal. Kòrsou a skohe pa duna e rekonosementu na IBIS Management.
Pa será e parti ofishal nos Promé Minister señor Eugene Rhuggenaath a hiba palabra. Sr. Rhuggenaath a pidi sala pa duna Alton Paas un seating ovation kual sala a kumpli ku ne. Sr. Eugene Rhuggenaath a mustra apresio pa e trabaonan ku Alton Paas ta hasiendo i ku e no a laga su situashon influensh’é negativamente. Promé Minister ta bisa ku su gabinete ta kompremetè pa inklui tur suidadano den komunidat i lo bai sostené e grupo ku limitashon.
Pues un anochi dirihí pa MC Scarlet Zalm karga ku inspirashon huntu ku deklamashon di Crisèn Schorea. Banda di e video di asesibilidat ku a bini dilanti a lansa otro video ku ta mustra ku un persona den ròlstul por move i hasi hopi i ku bida ta sigui.
Despues di e seremonia mes por a disfruta di e tremendo show di Randal Corsen i su orchesta. Tabatin momentunan ku asta algun persona den ròlstul tabata riba pista di baile pa baila i gosa di e musika. A zona kantikanan di salsa de los bravos i tambe kantikanan klasiko di pasado.
Un anochi sigur ku a laga tur hende gosa pero mas importante bira mas konsiente ku ora nos inkluí otronan nos tur ta gana pasobra nos tur ta benifisia di dje.
