Djasabra 24 di òktober, Fundashon Alton Paas a forma parti di e evento “Mi Salú, Mi Prioridat!” di Ministerio di Salubridat, Medio Ambiente i Naturalesa na Parasasa Beach. Bou di e lema “Aktivá bo kurpa!”, e Ministerio a invitá pübliko pa un atardi di movementu i salú, ku spinning, zumba, pilates, boxing, un workout pa hende di 60 aña pa ariba, un kaminata di 3.5K i Hyrox.
Den e Health Tent Area, nos tabata huntu ku ADC, SOKUDI, Sentro Salu Públiko, Fundashon Prevenshon, Sentro Salubridat Seksual, Avalon University i un dietista.
Pakiko FAP a partisipá? “Nos semper ta promové movementu i pa keda aktivo,” Alton Paas, CEO di FAP, ta splika. “Nos ke ta un ehèmpel di e futuro ku nos ta traha pa dje: un komunidat kaminda tur hende por tuma parti aktivo. Hopi hende den stul di rueda òf ku un limitashon no por uni ku otro aktividat di fitness. Ku nos ekipo, nos por a ofresé nan un momento di movementu, grátis. Esei ta nos kontribushon di mas grandi na un evento asina, banda di kompartí tokante nos kousa i nos servisionan.”
Na nos tènt, bishitantenan por a purba ekipo ku nos ta usa tur dia na AP Center:
- handcycle, un baiskel ku bo ta traha ku bo mannan
- MOTOmed, un baiskel semi outomátiko ku por move bo pianan pa bo
- med massager, ku ta vibra i ta kita tenshon for di bo pia i pianan
- massage gun
Nos a risibí pübliko, boluntario di e evento, partisipante ku a kaba e kaminata i asta hende di e otro tèntnan. Vários hende a purba e med massager i a sinti alivio mesora den nan pianan.
Nos fisioterapista nobo tabata presente tambe pa kontestá preguntanan mas spesífiko, por ehèmpel tokante skoliosis i problema ku kolumna vertebral.
Nos a parti informashon tokante AP Center, nos sentro di ehersisio adaptá despues di reabilitashon, i Wheelee, nos servisio di transporte pa hende den stul di rueda. Hopi hende no tin mester di nos awe, pero nan sa di un famia, un bisiña òf un amigu ku por tin mester di nos mañan.
Masha danki na Ministerio pa e invitashon, i na nos staf i boluntario pa nan dedikashon. Nos ta sigui traha pa un Kòrsou kaminda tur hende por move.
