Rònt Kòrsou por a presensia riba 3 di dezèmber último e transmishon Selebra Abilidat na e diferente plantanan di televishon i paginanan di facebook lokal. Un dia ku sigur lo keda marka den historia. E union entre e diferente fundashon i organisashonnan pa por a logra hala atenshon nashonal na e abilidatnan di personanan ku un desabilidat riba dia international di personanan ku un desabilidat na Kòrsou.
Fundashon Alton Paas ta hopi kontentu i agradesido pa e kolaborashon spesialmente ku Asosashon Totolika i Fundashon Pro 
Bista pa por a organisá e dia aki, apesar ku e pandemia aktual a kambia e plan for di un feria pa loke ela bira awor. Mester rekonosé ku ta hopi esfuerso a keda hasi huntu ku e otro 9 fundashonnan pa por a hasi e transmishon aki posibel.
E meta di e dia tabata pa por mustra e aspekto positivo di biba ku un desabilidat. Mustra kuantu kos por na Kòrsou ku un persona ku un desabilidat i alabes pone atenshon tambe na e diferente retonan ku ta presentá.
Pesei por a mira e diferente videonan di e diferente fundashon i nan klientenan pa bo haña un bista di sea talento, trabou òf empresa di e diferente personanan ku un desabilidat. E parti di mas impaktante tabata e kombersashon di e mamanan i tambe ku ministernan ku tabata den e panel interkambiando ku e diferente fundashonnan.
Komo Fundashon Alton Paas esaki ta un stap firme pa por trese e komunidat ku un desabilidat mas dilanti, kreando espasio 
pa mas dialogo i inklushon ku asina e nesesidatnan di esnan ku un desabilidat tambe por keda atendé riba un plano nashonal.
Pa un promé bia organisando algu di e magnitud aki sigur tin hopi lès pa saka afo, sigur tin mas fundashon i personanan ku un desabilidat ku ta ehèmpel pa mustra kuantu posibilidat mas tin pa personanan ku un desabilidat na Kòrsou.
Pa esei mes Fundashon Alton Paas ta entusiasma pa futuro kolaborashon i inisiativanan ku lo bini den 2021 i sigur lo siguí enfoká tambe pa krea mas kolaborashon pa traha na bienestar di personanan ku un desabilidat na Kòrsou.
