Diferente tòp instruktor a uni forsa un biaha mas pa hasi un diferensia
WILLEMSTAD, Un total di 16 instruktor di fitness a aseptá e reto pa duna un seshon di moveshon pa hinter komunidat por #move i alabes rekoudá fondo pa yuda den mehorá kalidat di bida di personanan ku ta sufri di un paralysis na Kòrsou.
Manera ya ta konosi dia 8 di mart próksimo na International School kuminsando 6’or di mainta tin e siguiente Annual Fitness Challenge. Esaki ta un fundraising di 6 ora ku diferente aktividatnan di fitness repartí den 3 area. Tin e kaminata di 5 i 10km, e maratòn di spinning di 6 ora pa grupo i tambe e seshonnan di fitness den sala.
E di 7 edishon aki lo tin Jolly Walkers ku lo guía e Kaminata ku ta kuminsá na International School pa bin kaba bèk na International School.
Lo tin un total di 6 instruktor pa e maratòn di spinning di kual 4 di nan ta konosí kaba ku ta Wendley Urselita, Diana Lopez, Mike Voz i Nancy Wanner. E dos instruktornan di spinning nobo pa e aña aki ta Patricia Buyne i Enrique Arvelo.
Pa e seshonnan di fitness lo tin Yoga, Fit Combat, Zumba, Salsamania, Senior Fitness, Pump-on-Wheels, Pilates, Kids Zumba. Kada unu 45 minuut tras di otro. E diferensia ta si ku pa e aña aki Yoga lo tin dos instruktor. Nos lo tin Janina i Emelton Charles ku lo bai duna Yoga. Ku e enfoke tambe pa enkurasha mas hende hòmber partisipá na Yoga.
Senior Fitness lo konta ku 3 instruktor kende ta D’angelo Felida, Nickelson de Windt, Grego Scharbaai. Senior Fitness ta un seshon basta gusta pa personanan riba 60 aña ku atrabes di musika di aña 80 lo move e kurpa bou di guia di e 3 instruktornan aki. E otro instruktornan ku a aseptá e reto pa por tei ta Charlyne Balentina, Helen Griffith, Ruth Kroes, Nelson John i Raimundo Betancourt.
Tur e esfuersonan aki spesialmente pa sigi enkurashá moveshon i inklushon bou di nos komunidat. Kada aña mas i mas hende a disidi di bai e reto i 
kumpra karchi pa nan #move. Asta diferente personanan ku ta sufri di un òf otro desabilidat fisiko tambe a skohe pa partisipá pa mustra ku no ta importá kon bo ta, pero nos tur por move di un manera.
Esaki ta netamente e meta di Fundashon Alton Paas pa baha e barera entre personanan ku tin un desabilidat fisiko i sobra di komunidat pa mustra ku nos tur huntu por ta aktivo pa nos bai dilanti.
Awor e reto ta bo dilanti pa abo tambe kumpra bo karchi pa #move i yuda esnan ku tambe mester move pero dor di sirkumstansia no por move òf tin ku move di un otro forma.
Pa bo partisipá na e kaminata i e seshonnan di fitness bo por kumpra karchi di adulto di 35 florin. Pa partisipa na e kaminata so, bo por kumpra e karchi di 15 florin. Si bo ta hoben òf 60+ bo por partisipá na e seshon di kaminata i fitness pa e prijs spesial di 15 florin.
Pa kualke pregunta semper bo por yama òf whatsapp nos na 5100087 of tuma kontakto via info@fundashonaltonpaas.org.