Organisá pa Fundashon Alton Paas
Willemstad – Dia 13 di september próksimo lo bai tin un konferensia di hinter un dia pa mehorá aksesibillidat na Kòrsou. Por konta ku diferente oradornan lokal eksperto i ku pashon riba e tereno di aksesibilidat pa tur empresa i suidadano ku ke sa i komprondé mas tokante e tópiko pa por prepará pa por risibí kualke persona ku un desabilidat na nan empresa of kas.
Aksesibilidat ketu bai ta birando un topiko mas i mas popular rònt mundu. Kompanianan ke ta aksesibel i ta interesá pa tene kuenta i hasi mas esfuerso pa por risibí un persona ku un desabilidat den su establesimentu. Segun VIC (Volksgezondheids Instituut Curaçao) su investigashon di aña 2017 ta indiká ku 9% di nos komunidat tin un desabilidat fisiko. Ora nos tende di desabilidat fisiko, nos persepshon hopi bia ta un persona den ròlstul ku no por papia i ta full dependiente di otronan. Pero 
según e raport di ‘VIC’ desabilidat fisiko ta hopi mas amplio i por keda reparti den e 3 kategorianan ku ta mira(siegu òf problema ku vista), skucha (surdu òf problema ku oido i mobilidat (difikultat ku kanamentu òf no por kana).
Diferente kondishon ku ta krea diferente abilidat. Abilidatnan ku por ta di balor pa nos komunidat si tin e infrasktura adekua pa por fasilitá partisipashon aktivo den nos komunidat. Apesar di e ínteres di e kompanianan pa por hasi nan establesimentu/edifisio aksesibel bo ta mira na diferente okashon ku e intenshon tei pero e ehekushon tòg no ta kumplí ku e nesesidatnan di e komunidat desabilitá. Tin masha poko kaminda ku ta disponé di e informashonnan korekto i tambe ku ta relevante pa e komunidat di Kòrsou.
Pesei Fundashon Alton Paas a skohe pa pone un dia pa enfoká riba aksesibilidat i laga tur esnan konserní i interesá bini huntu pa ekipá nos mes riba e diferente aspektonan di aksesibilidat i kon huntu nos por logra hasi kòrsou mas aksesibel. Lo bai tin diferente topikonan pa kompanianan plus tambe individuonan ku ke sa kon pa hasi nan kas aksesibel.
Ku esaki nos ke enkurashá tur persona pa subi e website www.korsouaksesibel.com pa haña mas informashon i tambe registra online mesora.