Kon bo ta apelá rechaso pa AVBZ ‘Lei di Labizjan’ na SVB.

May 28, 2016 | Community, News

Nos tur tin sierto derechonan basiko pa loke ta trata kuido mediko. Spesialmente personanan ku malesa króniko, ku tin derechi riba kuido di akuerdo ku lei AVBZ. Riba e website di SVB bo por haña tur informashon di e lei aki ku ta para pa Algemene Verzekering Bijzondere Ziektekosten AVBZ (Seguro General pa Gasto Médiko Spesial), ku ta mihó konosí komo ‘Lei di Labizjan’. Bo por klèk riba e link aki pa lesa over di e lei. Awor bo sa kiko AVBZ ta enserá i tambe kon bo por pidi pa haña esaki, pero kiko ta pasa ora SVB ningabo di haña e kuido dor di AVBZ?

Akinan kosnan por bira difisil. Hopi hende no sa ku nan por apelá e rechaso i kua ta e kaminda ku mester kana. E proseso no ta nada fasil i ta basá riba leinan teknikamente kompliká. Pa un persona ku un enfermedat króniko esaki ta aun mas difísil; e mester deal ku su desabilidat tur dia i  riba dje, e mester ta un eksperto den lei pa por kompronde e prosedura i tambe por skibi un karta di apelashon.

E proseso
Fundashon Alton Paas a kombersá ku Sra. Sandra Smith i gustosamente e la splika nos e proseso den término mas simpel i e la duna nos algun opshon kon trata ora SVB ninga e petishon pa kuido di akuerdo ku lei AVBZ. Segun Sandra, basikamente personanan ku tin malesa króniko, sin oportunidat pa por mehorá, ta kai bou di lei AVBZ.

Tin LAR, Landverordering Administratieve Rechtspraak, ku ta regulá AVBZ, komo tambe otro regulashon nan na SVB. Segun LAR, tin dos manera diferente pa apelá rechaso di SVB.

  1. Entrega di karta di opheshon na direktor di SVB
  2. Bai korte

 

E prome opshon
E persona ku tin opheshon kontra rechaso di un petishon, por apelá serka direktor di SVB denter di 6 siman despues di fecha dje karta di rechaso. Mester apelá ku un karta di opheshon ku ta inkluí e motibunan. Lo kolektá informashon di e departamentu en kuestion ku tabata involví den e desishon aki i ora nan tin tur informashon, nan ta invitá e kliente (i su representante, si e tin esaki), huntu ku e staff di SVB, pa un reunion formal pa diskutí e opheshon. Ambos partido ta haña e chèns pa trese nan punto dilanti, sea ta e keho òf defensa i ku e informashon adishonal aki, e komishon di konsehero ta evaluá e kaso i asina ta akonsehá direktor di SVB. E direktor no ta obligá di sigui e konseho aki, pero den majoria kaso, e ta hasi esaki. Si bestuur ta bai di akuerdo ku e komishon di konsehero pa aprobá e apelashon di e kliente pa AVBZ, nan lo notifiká e kliente ku un karta. Si e respuesta ta negativo, òf si e direktor di SVB ta bai kontra e desishon di e komishon, e lo notifiká e kliente esaki den un karta, ku su motibunan. E karta aki tambe ta sirbi komo desishon final di SVB.

 

Di dos opshon
Ora e kliente risibi e karta aki, e tin 6 siman pa hasi uso di e di dos opshon, ku ta bai korte i laga desishon final den man di juez. LAR ta deskribí kompletamente kon e prosedura aki ta bai. Bo por opta pa sea bo ta bai korte mesora enbes di apelá kontra e direktor di SVB òf bo ta apelá kontra e direktor di SVB prome i despues bo ta hiba e kaso den korte. Korte ta e ultimo paso ku por kana den e kaso i bo no por bai bèk na apelá kontra e direktor, despues di a bai dilanti juez.

Algun sugerensha
Esaki ta djies un splikashon kortiku kon e sistema ta traha, pero esaki ta algu básiko. E proseso no ta nada fasil manera e ta parse. E karta di opheshon mester tin varios rekisito manera ta presentá den LAR i mester sigui un prosedura tambe. E proseso por ta teknikamente hopi kompliká i un eror chikí por disidi kaba si e petishon lo wòrdu aprobá òf nò. Pesei Sandra ta rekomendá lo siguiente:

  1. Semper apelá prome na e direktor di SVB, asina bo por resolvé e kaso internamente sin bai korte. Esaki ta kosta sèn i tempu.
  2. Sea sigur ku bo apelashon ta kuadra ku e tempu ku ta rekerí i tambe wak pa tur e rekisitonan ta na òrdu.
  3. Si ta posibel, ta rekomendabel tin un abogado, un eksperto den lei of un konsehero ku por representabo na momentu di apelashon i ku ta sigur ku tur kos ta kana segun e prosedura korekto.
  4. Si bo no por paga un abogado, wak e posibilidat di tin un konsehero pro-deo (pagá dor di gobiernu) na departamentu di SAOW. Tambe ta posibel pa pidi informashon i judansa na Tienda di Lei; ku ta konsistí di studiantenan di lei ku ta duna konseho i asistensia gratis na e personanan ku no tin salario of ku tin un salario abou.

Nos ta spera ku e informashon aki por a juda un i tur ku a wòrdu rechasá pa e lei di AVBZ. Pa mas informashon, tuma kontakto libremente ku Fundashon Alton Paas.

Diskripshon AVBZ