Fundashon Alton Paas ta enkurashá Kòrsou pa kambia di konsientisashon pa akshon riba dia mundial di dwarlesi
Willemstad, Curaçao -Dia 5 di sèptèmber 2026 ku ta Riba Dia Mundial di dwarslesi (SCI), Fundashon Alton Paas ta djòin e komunidat internashonal pa marka e di dies aniversario di e dia importante aki. E tema di 2026, “Di Konsientisashon pa Akshon: Dies Aña Avansando Prevenshon di dwarslesi,” ta enfatisá ku konsientisashon mester kondusí na akshon práktiko i sostené pa prevení dwarslaesi.
Un dwarslesi por kambia bida di un persona den un fregá di wowo. E por afektá mobilidat, independensia, salú, empleo, bida di famia i partisipashon den komunidat. Na mes momento, hopi dwarslaesi por keda prevení.
Na Kòrsou, prevenshon ta rekerí atenshon kontinuo na seguridat riba kaminda, stür responsabel, prevenshon di kaida, partikularmente bou di adultonan di edat avansá. Lugánan di trabou seif, prevenshon di violensia, i seguridat den i rònt di laman. E ta rekerí tambe akseso na kuido di emergensia i trauma na tempu ora un leshon sosodé.
Fundashon Alton Paas tin mas ku un dékada ta trahando pa mehorá kalidat di bida di personanan ku ta biba ku dwarslesi i otro limitashonnan di mobilidat. Pa medio di e AP Center, e fundashon ta soru pa ehersisio spesialisá bou di guia i sosten kontinuo despues di rehabilitashon. Pa medio di
Wheelee, e ta kontribuí na transporte aksesibel, yudando personanan ku ta usa un ròlstul òf tin mobilidat limitá keda konektá ku e kosnan dushi di bida i ku ta hasi e bida kompleto manera famia, komunidat, edukashon, entrenimentu i asta kuido di salú.
“Tur persona ku un dwarslesi tin un historia. No solamente di un evento ku ta kambia bida, pero tambe di resiliensia, adaptashon i e derecho di keda parti di sosiedat,” Fundashon Alton Paas a bisa. “Nan eksperensia mester guia kon nos ta prevení leshonnan i kon nos ta konstruí na un Kòrsou mas aksesibel i inklusivo.”
E fundashon ta subrayá ku prevenshon no por ta responsabilidat di un organisashon òf un sektor so. Prevenshon efektivo ta rekerí atenshon i akshon di kada suidadano di e país, asta e suidadano nan ku ta forma parti di nos sektor publiko, dunadónan di kuido di salú, skolnan, dunadónan di trabou, stakeholdernan di transporte i seguridat riba kaminda, organisashonnan di komunidat, famianan i ekspertonan pa eksperensia.
Dia Mundial di dwarslesi pues no ta solamente un momentu pa reflehá riba e retonan ku personanan ku e leshon ta enfrentá. E ta tambe un yamada pa fortalesé prevenshon, aksesibilidat, sosten kontinuo, i oportunidatnan igual pa partisipashon.
Dia 5 di sèptèmber, Fundashon Alton Paas ta invitá komunidat di Kòrsou pa karga i sigui hiba e mensahe pa prevení loke por keda prevení, sostené esnan afektá, i traha huntu pa un sosiedat den kua kada persona por biba ku dignidat, independensia, i oportunidat.