Awe, 3 desèmber ta Dia Internashonal di Personanan ku Desabilidat. Riba e dia aki, WHO ta uni ku partnernan rònt di mundo pa yama pa akshon pa logra e metanan di desaroyo sostenibel (SDG’s) pa, ku, i pa medio di personanan ku desabilidat.
Mas di 1.3 bion persona ta eksperensia desabilidat signifikante awe, esaki ta representá 16% di e poblashon global. Hopi persona ku desabilidat ta muri mas tempran, tin un riesgo oumentá pa desaroyá diferente kondishonnan di salu, i ta eksperensiá mas limitashon den funshonamento diario ku e resto di e poblashon. Nos ta yama e resultadonan di salu aki “desigualdatnan den salu” pasobra nan ta mayormente evitabel i kousá pa faktornan inhusto den i fuera di e sektor di salu. E
faktornan aki ta inklui, por ehèmpel, diskriminashon den nos sosiedat, politikanan desigual, e determinantenan di salu, falta di akseso òf kalidat di kuido, i aktitutnan negativo di personal di salu – pa menshona algun. E desigualdatnan den salu aki ta un rekordatorio importante ku personanan ku desabilidat hopi biaha ta keda tras i ku pa logra bon salu i bienestar pa tur (SDG3) ta rekerí partisipashon signifikante i empoderamentu di personanan ku desabilidat.
Logra e metanan di desaroyo sostenibel (SDG’s) pa, ku, i pa medio di personanan ku desabilidat ta posibel awor mas ku nunka, tanten ku nos ta uní. Na 2019, Sekretario General di ONU António Guterres a lansa e Strategia pa Inklushon di Desabilidat (UNDIS) pa bringa pa inklushon di desabilidat den kada trabou i funshon basiko di e sistema kompleto di ONU. E UNDIS a duna nos e hèrmèntnan pa inisia un transformashon sistematiko ambisioso, i ta impulsá un progreso sin presedente pa, ku, i pa medio di personanan ku desabilidat rònt mundo. E logronan aki ta demostrashonnan notable di e balor di planifikashon sistematiko pa inklushon di desabilidat, un motibu pa selebrá, i un fuente di aspirashon pa sigui ku e esfuersonan aki.