WILLEMSTAD, Fundashon Alton Paas ta presentá un fundraising úníko den forma di benta di kuminda for di un trùk di pan, ku tin komo meta krea un futuro sin limitashon pa personanan ku tin un dwarslaesie i otro diskapasidatnan neurologiko.
E fundraising lo tuma lugá diá 10 di november, for di 5’or atardi te ku 8’or di anochi, na Winkelcentrum Colon. Pa e fundraising aki, hendenan por bestèl adelantá for di e siguiente opshonnan di kuminda: pan ku galiña pa 13 florin, pan ku pòrkchòp pa 14 florin, pan ku steak pa 15 florin òf un kup di sòpi pa 7 florin.
Pa partisipá na e fundraising aki, hendenan mester hasi nan pedido promé ku dia 3 di november. Por hasi pedido dor di tuma kontakto ku e number di telefòn di Fundashon Alton Paas, i nan lo risibí nan karchi ku nan pedido riba dje. E pago ta konfirmashon di e pedido i por keda paga onlain ku un tarheta di kredito, transferensia bankario, kesh òf swaip na nos sentro na Colon.
Fundashon Alton Paas a keda fundá dia 7 di sèptèmber 2012 ku e meta pa krea un futuro sin limitashon pa e personanan ku tin un ‘dwarslaesie’ i otro diskapasidatnan neurologiko na Kòrsou. E organisashon ta trahando pa realisá un Kòrsou kaminda nos por mira un mama ku tin un ‘dwarslaesi’ den su ròlstùl trese su yu skol, òf kaminda nos por bai un bar i mira un grupo di amigonan ta dal un drinks di kual un di nan ta den ròlstùl. Tur nos esfuersonan ta dirigí pa e vishon aki.
Na Kòrsou, tin un promedio di un persona pa dia ku ta risibí un ataka selebral i anualmente, tin un promedio di 30 persona nobo ku ta risibí tratamentu pa un óf otro tipo di parálisis i limitashon di mobilidat. Esaki ta nifiká ku riba promedio, por tin 400 persona pa aña ku ta sufri di algun forma di paralisis. Fundashon Alton Paas ta brinda sosten esensial na e personanan aki despues ku nan kaba e fase mediko ku nan bai nan kas bèk. Ta yama esaki tambe ‘post rehabilitation care’. Pesei e fundraising aki ta asina esensial pa yuda karga e esfuersonan pa e grupo aki por tin un mihó kalidat di bida.
Un elemento spesial di e fundraising aki ta tambe e oportunidat pa duna e kuminda na hendenan den nesesidat, via un
kolaborashon ku Voedselbank. E kumindanan lo keda distribuí na hendenan ku tin mester. Pues si bo no kier kumpra e kuminda pa bo mes kome, bo por kumpra e kuminda pa hasi donashon via Voedselbank.
E fundraising ta un evento spesial pa Fundashon Alton Paas, organisá pa boluntarionan i tambe ku sosten di e chef lokal, Malcolm Helmijr. E meta ta pa bende 1000 kuminda pa sostené e vishon pa krea un futuro sin limitashon.
Pa hasi un pedido òf pa mas informashon, por yama òf whatsapp na 5100087. Ku boso partisipashon, boso ta krea un impakto dòbel: sostené un futuro sin limitashon i duna un man na hendenan den pèrta ku por gosa di un pan di truk durante un atardi di djabièrne 10 di novèmber