Esaki ta e mensahe prinsipal den kuadro di Día International di Dwarslaesie
WILLEMSTAD, Dia 5 di sèptèmber ta Dia Internashonal di Dwarslaesie. E atenshon di un dia internashonal ta hèrmèntnan di gran balor pa promové konsiensia públiko y aktivá komunidatnan riba sierto tópiko di preokupashon. For di 2016, ISCoS (International Spinal Cord Society) a disidí di skohé e “Dia di Dwarslaesie” riba 5 di sèptèmber di kada aña. Tur aña e ta tuma lugá bou di diferente lema i temanan ku ta enfatisá e problemanan mas aktual ku ta afektá personanan ku dwarslaesie.
Tema pa aña 2023 ta “Akseso na servisionan pa ku dwarslaesie (spinal cord injury SCI) – Un bida menos kompliká”. Akseso na servisionan pa ku dwarslaesie (SCI) ta fundamental pa personanan ku e leshon i nan famia. Sinembargo, akseso na e servisionan aki por ta kompliká pa motibu di diferente faktor, manera falta di rekursonan disponibel, lokashon geográfiko, limitashonnan finansiero i falta di konosementu di e servisionan disponibel. Esaki por hiba na un bida innesesariamente kompliká, agregando mas reto na un situashon ku ya ta difísil.
Por lo general na Kòrsou nos sistema mediko por brinda un bon kalidat di kuido vooral pa e kosnan basiko. E reto ta bira pio después ku e hende yega kas i e tinku sigui ku su bida.
E Komité Di Prevenshon Di ISCoS, ta urgí pa traha pa mehorá akseso na servisionan pa ku dwarslaesie (SCI). Esaki ta nifiká ku mester lucha pa mas finansiamentu i sosten pa e servisionan pa ku e leshon di dwarslaesie (SCI), promové konsiensia tokante e servisionan disponibel i traha pa eliminá kualke barera ku ta stroba hende di aksesá e servisionan vital aki.
Si nos enfoká riba e tema di e aña aki, nos por logra avansenan signifikante pa sigurá ku personanan ku dwarslaesie (SCI) tin akseso na e rekursonan ku nan mester pa logra un rekuperashon optimal y biba un bida kompleto.
Fundashon Alton Paas tin e vishon: un futuro sin limitashon. Esaki ta nifiká krea un Kòrsou kaminda maske un persona por a
haña un dwarslaesie, tòg e por partisipá aktivo den komunidat. Pa alkansá esaki mester siguí krea konsiensia i eliminá bareranan ku ta stroba e persona ku dwarslaesie tin un mihó kalidat di bida! Pesei mes ayera 4 di sèptèmber 2023 nos apresentá un inisiativa na gobièrnu pa transporte aksesibel subsidiá kaminda tur persona ku dwarslaesie, den ròlstul òf ku limitashon di mobilidat mester por haña akseso mas fasil pa sali i partisipá aktivo den komunidat. Esaki ta algu ku ta na benefisio general pa Kòrsou. Nos ta enfoká riba krese nos ekonomia ku turista i invershonista lubidando e grupo di hendenan ku un desabilidat fisiko ku tambe por kontribui na esaki atraves di baha e barera di transporte. Otro aspekto ku Fundashon Alton Paas ta dediká atenshon na dje ta pa yega na un futuro sin limitashon ta yuda krea un bida menos kompliká atraves di ehersisio. Nos ta yama esaki “Post Rehabilitation Care” i dia 10 di sèptèmber proksimó lo bai tin un día Habrí di AP Center. Esaki ta duna e oportunidat na kualke persona ku tin difikultad pa move òf ta den ròlstul por bin será konosí ku e fasiliidat di ehersisio gratuitamente. A sobra solamente 5 luga mas ku un persona por registrá pa yega na su sita kaminda lo e haña un trainer pasa ku ne den un lista di pregunta pa komprondé e persona su kaso pa asina por duna un bista di kon lo por yuda e persona den AP Center uzando e diferente aparatonan i ehersisionan spesial pa e persona por alkansa su meta. Pa tur ku ta interesá ainda den e Día Habrí, nan por bèl òf manda un whatsapp na 5100087 pa registrá i yega na e ora di e sita.
Un di tres elemento asina krusial pa krea un bida menos kompliká ta aksesibilidat. E palabra aksesibilidat ta un palabra konsistiendo na dos palabra masha importante. E promé ta akseso i e otro ta abilidat. Nan ta importante pasobra dor di krea un Kòrsou aksesibel nos ta haña mas akseso na nos abilidatnan. Ta masha importante pa Kòrsou haña mas akseso na su abilidatnan paso nos no por yega na nos potensial total komo pais si nos no inklui tur suidadano. Pesei ta asina importante pa un día asinaki ku ta día internashonal di dwarslaesie pa nos kada unu duna di nos banda sea komo suidadano, gobièrno i asta sektor privá pa sigui krea un bida menos kompliká pa hendenan ku dwarslaesie.
