Ki grandi Kòrsou ta ku nos por gradisí kada persona i instansia ku a koperé ku e fundraising un Bon Stobá. Dia 6 di novèmber último tabata tin e di dos fundraising di Fundashon Alton Paas pa e aña 2022. Esaki tabata den mesun forma ku nos otro fundraising Dushi Sopi. Hendenan por a koperá ku karchi òf hasi pedido online pa sea nan mes bin tuma e kuminda òf entrega esaki na personanan den nesesidat.
E kumindanan ku tatin tabata sea kolo stoba, galiña stoba òf vegan pasta. Esakinan a keda drecha pa e kòki Malcolm Helmijer. Un di e kòkinan ku semper ta koperá pa hasi un diferensia ku su kumindanan for di tempu di The Annual Fitness Challenge.
E fundraisingnan aki tin komo meta pa rekoudá fondonan pa sigui hasi i mantené e inisiativanan pa mehorá e kalidat di bida di personanan ku dwarslaesie i otro tipo di situashonnan neurologiko. Speshal awor ku e di 10 aniversario di Fundashon Alton Paas ta prueba ku e organisashon tin derechi di eksistensia. Apesar di tur e logronan i resultadonan tòg ta difisil pa yega na e fondonan nesesario via instansianan gubernamental òf otro tipo di subsidionan.
Pesei fundraisingnan manera Bon Stobá ta asina importante kaminda nos ta hasi un petishon na komunidat pa koperá.
Manera indiká promé nos a logra hiba mas ku 400 kuminda pa donashon. 300 di e kumindanan a bai via Voedselbank pa e organisashon Caritas. Esaki na su turno a sòru pa repartí e kumindanan ku a bai diferente parokia di misa katoliko i asina parokianonan den bisendario ku ta den nesesidat por a pasa na e misanan pa tuma kuminda.
Banda di esei tatin algun kuminda ku a bai pa Kas di kuido dr. M.J. Hugenoltz i tambe pa hendenan individual den diferente otro barionan.
Asina kada persona i instansia ku a paga pa e karchinan i a skohe pa entrega nan pa personanan den nesesidat por a hasi un dòbel impakto.
Nos mester yama danki na e diferente instansianan ku a koperá sea dor di kumpra karchi òf koperá ku produkto. Un danki speshal na boso!
