Fundashon Alton Paas ta gradisí tur esnan ku a yuda aportá na Dushi Sòpi ku ta e promé fundraising di 2022. E promé fundraising aki a bai den forma di un bendementu di sòpi. Tur hende por a kumpra karchi adelantá i skohe entre sòpi karni i sòpi bèrdura.
Por bisa ku e fundraising aki tabata un eksito. Tabata tin 700 karchi pa bende i a logra bende tur karchi. For di e djaweps promé ku dia di tuma Sòpi ya mester a anunsia ‘Sold Out’ di karchinan. Loke a hasi esaki posibel ta e diferente kompanian ku a paga pa sòpi ku por a keda entregá na personanan den nesesidat via Voedselbank.
Total 368 sòpi a keda entregá na personanan den nesesidat di kual 300 a bai via Voedselbank pa e organisashon Daily Meal program ku ta yuda pa duna kuminda kayente na hendenan den nesesidat. Esaki ta loke a pone ku e fundraising aki tatin dòbel impakto. Pasobra banda di yuda yega na fondo pa mehorá kalidat di bida di personanan ku un limitashon fisiko via nos
fundashon, tambe por a hasi algun persona den nesesidat kontentu ku un dushi sòpi.
Tabata tin hopi entusiasmo di e Dushi Sòpi ku for di promé ku 12’or ya kaba tabatin hende ku a bin pa tuma nan Sòpi i asta ku tabata interesá pa sinta kome na Hofi Bill mes. Segur ideanan pa konsiderá pa futuro.
Mester gradisi Koki Malcolm Helmijer i su kolaboradornan pa e sosten ku e sòpinan. Ta mesun kòki ku ta prepará kosnan di kome durante Fitness Challenge i ku ainda por a konta riba su sosten pa prepará e Dushi Sòpi pa e okashon aki tambe. Nos ke gradisí sra Roos ku a logra traha tur e 700 pan seránan. Tin diferente otro organisashon i kompania mas ku tambe nan aporte tabata hopi balioso pa e èksito di e fundraising.
Por último mester gradisi tambe e boluntarionan ku a yuda riba e dia ei. Algun di nan ta personanan ku ya na diferente okashon ta yudando Fundashon Alton Paas i otronan ku ta pa promé bia ku nan ta yuda. Un gradisimentu spesial na nan pasobra dor di nan por a sòru pa tur sòpi tabata kla prepará pa Voedselbank i tur e otro personanan ku a bin pa tuma nan Sòpi.