Manera kustumber tur aña Fundashon Alton Paas sa organisá inisistivanan pa rekoudá fondo pa logra su meta i proyektonan pa kada aña. E aña aki meskos Fundashon Alton Paas tin su promé fundraising pa 2022. Esaki lo bai ta den forma di un Dushi Sòpi. E sòpi aki no ta deskonosí pa personanan ku sa partisipá na e fitness challengenan di pasado di Fundashon Alton Paas. E mesun kòki kual ta Malcolm Helmijr lo ta responsabel pa esaki i a koperá un biaha mas pa yuda prepará un dushi sòpi ku bo por kumprá i asina yuda rekoudá fondo.
Dushi Sòpi
E fundraising aki lo tuma lugá día 13 di mart proksimo na Hòfi Bill. Mester kumpra karchi adelantá i alabes skohé si bo ke sòpi karni òf sòpi bèrdura. Bo por bin dia 13 di mart entre 12’or pa 2’or pa bo por pasa tuma bo sòpi na Hofi Bill. Ku e kontribushon di 10 florin bo ta haña bo kùp di 16oz plus un pan será pa bo por disfrutá di bo sòpi.
Dòbel Impakto
Un elemento adishonal den e fundraising aki ta ku pa e personanan ku ke koperá ku un sòpi pero nan mes no ta interesá den tuma esaki nos lo bai hasi algu spesial. Nos lo bai laga entregá e kùpnan di sòpi aki na personanan den nesesidat. Pues si bo ke koperá pero bo no ke tuma e sòpi bo por skohe di laga nos entregá esaki na un persona den nesesidat. Mester avisá esaki adelanta si.
Fondonan nesesario
Apesar di tur e esfuersonan i testimonionan ainda Fundashon Alton Paas ta dependiente di fundraising i donashon pa kumpli ku su meta pa mehorá kalidat di bida di personanan ku un dwarslaesie i otro problemanan neurologiko. Fondonan ku nos logra yega na dje via e aktividat aki lo sòru pa gastunan di AP Center i tambe Wheelee ku tambe a sufri efektonan negativo di e pandemia ku ainda nos ta pasando den dje. E fondonan aki lo hasi posibel ku nos por sigui yuda personanan ku un dwarslaesie i otro problemanan neurologiko.
Ku esaki nos ke invitá bo tambe pa koperá ku e fundraising aki. Sea ku ta abo mes ke kome sòpi òf si bo ke koperá dor di paga un sòpi pa laga un persona den nesesidat tuma esaki. Kualke eskoho ku bo hasi lo tin un diferensia grandi den bida di otronan.
Si bo tin kualke pregunta òf remarke bo por tuma kontakto ku nos dor di bèl òf manda un whatsapp na 5100087 òf manda nos un email na info@fundashonaltonpaas.org.