Fundashon Alton Paas a lanta ku e meta pa trese konsientisashonn i traha riba un mihó bienestar pa personanan ku un dwarslaesie i otro tipo di paralisis. Esaki pa alkansá e vishon un futuro sin limitashon, kaminda bo ta mira un persona por partisipá aktivo den komunidat maske ku e ta usa un ròlstul pa move.
Trahando riba esaki bo ta mira e diferente retonan ku tin pa personanan ku ta usa ròlstul. Sea ku ta e fondo pa kubri un transporte, e orario pa haña transporte òf e okashon ku tin bia ta trese èkstra limitashon pa un persona den ròlstul por sali i disfrutá di e kamindanan ku un persona den ròlstul por bai.
Awor aki ku ta yegando fin di aña 2021 i ku nos ta birando aun mas konsiente kon pa biba ku e normal nobo ku covid-19, e
oportunidatnan ta presentá pa kuminsa sali bèk.
Danki na e diferente donantenan di Fundashon Alton Paas por a kuminsá un kampaña spesial pa por yuda mas hende den ròlstul ku transporte aksesibel pa tarifa di 20 florin bai i bin bèk.
Nos tin dos Wheelee spesial pa por transportá un persona den ròlstul huntu ku dos akompañante ku ta kana ku por bai gratis huntu ku e persona den ròlstul. Un di e Wheeleenan ku ta modèl Citroen Berlingo tin espasio ku e ròlstul ta bai te dilanti banda di e shofùr i e otro Wheelee ku ta modèl Peugeot Partner tin espasio pa ròlstul mas grandi, bo por sinta banda di bo akompañante.
Pues si bo ta den ròlstul i bo ke bai sali. Bo por Whatsapp òf bèl nos na 5100087 i reservá un di nos Wheeleenan pa hiba bo kualke kaminda, kualke ora i kualke día i buska bo bèk. Pa esaki bo ta paga solamente 20 florin.
Tur esaki ta pa logra ku e persona den ròlstul por sali for di su isolashon i disfruta di Kòrsou huntu ku su sernan kerí meskos ku kualke otro persona.
Ku esaki nos ke enkurashá mas persona den ròlstul òf famia di un persona den ròlstul pa tuma kontakto ku nos i hasi bo reservashon pa asina abo tambe por probechá di e kampaña aki ku ta balido te ku desèmber 2021.