Mi ta un persona ku tin un pashon pa skibi. Mi gusta partisipá den kompetensia pami sa ku mi tin aden ahinda i un día ku mi a yega na kas despues di training, un inspirashon a drentami pa dedika un poesía na Fundashon Alton Paas i mi a bai partisipá ku e inspirashon aki den e kompetensia di djis un pensamentu.
Mi a yega di skibi pa diferente kompetensia den pasado manera Prins ku Pancho, Reina Tiner, Reina di karnaval, Reina hubenil, Dama kultural. Mi ta sintimi bon pa skibi nan teksto. Mi ta hinka mi mes den e ròl pami skibi i mayoria a logra kai den premio tambe. Mi tin 22 aña ta hunga den komedia, Promé Serka Anthony Jamanika i después Pachi Damon. E eksperensia nan ei tambe a yuda desaroyá mi skibimentu
Mi forma di skibí tambe ta ku hopi bia mi ta usa e lèternan di un nòmber òf un palabra i forma mi poema kune. Pa esun di aki mi kier a krea algu di motivashon tantu pa ami mes i otro klientenan ku ta bin train na AP Center. Ta gewon un bia mi a yega kas i e inspirashon a dal mi pa skibí algu dediká na Fundashon Alton Paas. Pasobra semper ora mi ta na AP Center di Fundashon Alton Paas bo ta haña un dushi sintimentu. Bo ta haña mas animo, speshal ku e trainernan. E ta un trato spesial. Tur hende ta duna bo un empuhe, ni un hende un ta kibra bo, tur hende ta motivá bo i esei ta un dushi sintimentu.
Mi mes tin 9 luna ta bin AP Center dor ku mi a haña un ataka selebral i e no ta niun tiki fasil. Mi por kana si pero mi ta perde balansa, pia nan ta swak i tin bia ta asta difícil pa splika tur e kosnan ku mi ta sinti pero ora mi tei na AP Center mi ta haña bon yudansa i motivashon pa sigui pa dilanti.
Pesei e mensahe ku mi kier a trese ku mi poema ta:
Ku bo ke, bo por!
Tur loke bo ke hasi bo por paso Dios no ta duna bo un karga ku bo no por karga.
Mi a sinti mi bon ora mi a haña sa ku mi a gana. Den 50 partisipante, mi poema a sali den e 10 nan ku a gana. Eseinan tabata esnan mas motivador i inspirativo. Pa ami esei kiermen ku e mensahe a yega.
Si bo ke, bo por!
