‘Activity-Based Training’ ta un metodologia spesial desaroyá pa trein personanan ku a haña un leshon neurologiko, pa menshona dwarslesi, ataka selebral, MS, ALS, ets.. Esaki ta pone enfasis riba e partinan di e kurpa ku ta mas debil i asta sin funshon, hasiendo uso di diferente forma di stimulashon eksterno i repetishon ku e meta pa krea funshonnan nobo na e partinan afektá di e kurpa ku tin un paralisis.
E komienso
Un di e katalisadornan di ‘Activity-Based Training’ ta e konosido Christopher Reeves ku tabata un di e promé kreyentenan den 
e tipo di ehersisio aki ku a skohe di hasi’e i alaves invertí den desaroyo i investigashon di e area aki. Christopher Reeves mes ta konosí komo un di e promé aktornan ku a hunga komo superman. Lamentablemente na aña 1995 Christopher Reeves a haña un dwarslaesie basta haltu dor di un aksidente ku kabai. Esei a pone ku hinter su kurpa a keda paralisá. Atrabes di diferente seshonnan di Activity-Based Training tabata poné para i tambe yudé kana via aparatonan spesial. Despues di tempu a kuminsá mira un dede di su man kuminsá move. Esei tabata e komienso di e desaroyo mas notabel di Activity-Based Training.
E sensia
Atrabes di investigashonnan a bin yega na konklushon ku den e sistema nervioso ta eksistí algu ku yama neuroplastisidat. Neuroplastisidat ta nifiká e abilidat pa e sèlnan den e nervio reorganisá su mes después di un leshon of malesa si nan haña e stimulashon korekto. Ku Activity-Based Training e ehersisionan ta spesial diseña pa stimulá e sistema nervioso netamente pa krea mas neuroplastisidat. Ku e meta pa e señal ku e serebro manda pa e kurpa por haña un otro ruta den e sistema nervioso pa yega tòg na e areanan bou di e nivel di leshon si ta den kaso di dwarslesi òf si ta un ataka selebral pa e otro parti di e serebro tuma e trabou over di e parti ku no ta funshonando. Una bes ku tin un daño, e meta no ta enfoká riba e kaminda spesifiko ku tin daño pero ta mas bien pa e sistema nervioso haña otro manera pa konektá di nobo ku por krea funshonnan nobo atrabes di e stimulashonnan eksterno i hopi repitishon ku ta oumentá e neuroplastisidat den e sistema nervioso i e serebro.
E desaroyo
Den sigur e ùltimo 20 añanan e mundu di ‘Activity-Based Training’ a bin desaroyá hopi i ku hopi variashon i tin kaminda mas spesifikashon.
Tin organisashonnan ku ta enfoká solamente riba e entrenamiento di kana komo e punto klave di Activity-Based Training. Pues apesar ku e hende no por kana ta poné den un aparato spesial robotisá òf ku asesorionan spesial ta poné para i ta laga trainernan òf e aparato hasi e moveshon di kanamentu ku e persona.
Tin organisashon ta pone enfasis riba e stimulashon di e nervio dor di usa spasme (moveshon involuntario) ku tin den e kurpa pa yuda e persona haña kòntròl di e spasme i kombertí e moveshon inboluntario pa e bira boluntario.
Atraves di tur e desaroyo aki principalmente personanan ku dwarslaesie a bin mira logronan signifikante. No solamente di hendenan ku a bin kana pero asta yega na mas miho sensashon di nan kurpa, mas miho kontrol di orina i di hasi shushi, redukshon den dolo i spastisidat di muskulo. Esaki a pone ku na Merka, dòkter nan awor ta bisando menos ku un persona no por bin kana bèk òf ku e persona ku dwarslaesie lo no por bira mihó dor ku diferente persona ku hasi ‘Activity-Based Training’ a prueba lo kontrario. Awor dòkternan ta bisando ku nan no sa. Asta enkurashando nan pa purba un programa di ‘Activity-Based Training’ pa wak si esei por yega na mihó resultado. Por lesa mas di esaki dor klek aki
Activity-Based Training na Kòrsou
Pa e ultimo dos añanan tambe tin ‘Activity-Based Training’ na Kòrsou na AP Center di Fundashon Alton Paas kaminda tin 3 trainer ku a keda sertifiká pa e kompania merikano Neuro Ex. E kompania aki ta dirihí pa señor Eric Harness ku a hasi diferente investigashon riba e materia i ta konosí mundialmente komo un pionero den e mundu di Activity-Based Training dunando lektura i workshòpnan riba e topiko aki. Despues di ta mas ku 3 biahe na Kòrsou kuminsando for di 2013 por a yega na un kolaborashon estrecho entre Neuro Ex i Fundashon Alton Paas ku a fasilitá e sertifikashon di 3 trainer na Kòrsou. Esaki a hasi Kòrsou e úniko sentro den Karibe sertifiká pa duna ‘Activity-Based Training’. Un inovashon pa por sigui sirbí personanan ku tin un paralisis ku ta na kas pero ku tin e motivashon pa sigui mehorá nan kondishon.
Na momento ku un persona bini pa hasi ‘Activity-Based Training’ na AP Center, mayoría ora e ta pafó di su ròlstul. Ta pon’é den e diferente posishonnan ku e kurpa ta trahá pé, sea ku ta para, drumi, riba rudia, gatia, sintá abou pa hasi e diferente tipo di ehersisionan segun su kondishon i meta pa asina duna e kurpa e stimulashonnan ku e meta pa krea funshonnan nobo den e kurpa. Apesar ku esei ta e meta no por garantisá ku tur hende ta logra meskos, kada hende ta otro i kada hende lo tin otro programa detayá pa nan i pasando den un programa asinaki a lo menos lo yuda e hende bira mas fuerte i mas salu dor di ta aktivo fisikamente. Sin embargo mayoría hende ku eksperensiá un programa di ‘Activity-Based Training’ ta mira mas adelanto si. Ta según ku nan ta den e programa bo por mira kon e kurpa ta desaroyá.
Pa sa mas di Activity-Based Training por tuma kontakto libremente ku AP Center via whatsapp na 5100087 of email support@fundashonaltonpaas.org