Fundashon Alton Paas ta gradisi pueblo di Kòrsou pa partisipá
WILLEMSTAD, Dia 8 di mart 2020 por a nota hopi kara soda i satisfecho ku nan partisipashon na e fundraising anual di Fundashon Alton Paas pa por rekoudá fondo pa sigui mehorá kalidat di bida di personanan ku un òf otro paralisis na Kòrsou.
Apesar di kambionan di último ora di e kaminata ku a bira solamente 5km tòg tabatin hopi persona ku a gusta e ruta nobo bou di guia di polis i Jolly Walkers ku a bira e di 3 bia ku tabatin un kaminata komo parti di e programa di e Annual Fitness Challenge. Pa e area di spinning tambe tatin e 
diferente gruponan ku a partisipá i tambe personanan konosi manera Encho di e grupo di komedia Chopo Chopo ku a bai e reto riba un di e spinbikenan.
Den sala tambe tabatin e diferente seshonnan di fitness ku mesun schedule manera aña pasa i ku tur persona a keda enkanta. Por a konta ku partisipashon di algun persona konosi den nos komunidat ku a bini pa duna sosten. Manera entre otro Minister Hensley Koeiman, Akisha Alberts, Eldrion Regina, Omayra Leeflang i asta reina di karnaval di e aña aki Kimberly Martis i tambe e rei i reina tiner di e aña aki Kyon Chirino i Rashaily Martis.
Manera ya indiká The Annual Fitness Challenge a krese bira mas ku un fundraising. Ela bira un plataforma di inklushon, un vehikulo pa krea mas konsientisashon riba desabilidat engeneral na Kòrsou.
Pues Fundashon Alton Paas ta hopi gradesido na tur e sosten di Kòrsou i espesial e kompanianan ku a hasi donashon, spònser ku nan servisio òf produktonan pa por a mehorá e eksperensia di kada persona ku a skohe di bin move e djadumingu ei, dia di hende muhe.
E aña aki tambe tabatin un instruktor ku a kumpli 5 aña partisipando gratuitamente pa stimulá mas moveshon den nos komunidat. Esei ta Ruth Kroes 
ku a bin ta koperá ku e Annual Fitness Challenge 5 aña kaba, promé komo instruktor di spinning pa dos aña i awor tin 3 aña ta dunando Pump-on-wheels ku ta e seshon spesial pa personanan den ròlstul.
Ku esaki nos por wak bèk riba e di 7 edishon di the Annual Fitness Challenge komo un eksito i alaves ta pidi komunidat di Kòrsou pa keda wak nos rednan sosial pa sigui mira e impakto di nan sosten riba bida di personanan ku ta sufri di un òf otro paralisis na Kòrsou.
