WILLEMSTAD,Fundashon Alton Paas ta hopi kontentu i agradesido pa e sosten na e Annual Fitness Challenge 2019 ku a tuma lugá 10 di mart último. Un mainta eksitoso ku diferente karanan kontentu i sodá di tur e moveshonnan ku ta tin e mainta ei.
A kuminsá for 5:30 AM ku apertura kaminda Minister Hensley Koeiman tabata presente i a duna un palabra. Despues di un 
stretching tabatin konteo di Jolly Walkers pa start ku e kaminata pafó i tambe na mesun momentu a kuminsá ku Yoga den sala i spinning ku tabata situá riba e parkeerplaats di International School. E kos di mas spesial e aña aki tabata tur e personanan den ròlstul òf ku difikultat pa kana ku tabata tei pa hasi moveshon. Tur aña kompanianan ta hasi posibel ku personanan den lugánan di kuido òf kas di hende grandi por sali for di nan ambiente tradishonal pa bini e Fitness Challenge pa hasi moveshon den e forma ku nan por.
E aña aki e kantidat di personanan ku por a bin hasi esaki sigur ta algu di aploudí paso si bo por a mira kara di e personanan ora nan tabata den moveshon lo bo a keda kontagia ku nan legria. Meskos ta konta ku gruponan hubenil i muchanan di algun internatnan ku tabata tei. Ku e idea pa pone nan den un ambiente inklusivo pa mustra ku moveshon ta importante i ku nos tur por move ku abilidatnan ku nos tin. Apesar ku un hende por ta den ròlstul òf 
no.
Algu mas great ku a sosodé durante di e Fitness Challenge ta tur e diferente personahenan konosí ku a bin spin pa hinter un ora. Ta tin diferente lokutor di radio, hende di media i asta kòki ku a bin mustra ku nan tambe por. Tur esaki pa pone atenshon na dwarslaesie, paralisis i e situashonnan rondó di dje. Abo ku a sostené di kualke forma por ta orguyoso di loke ba hasi posibel.
Abo a hala hende huntu pa un kousa asina importante den nos komunidat. Bo a pone ku hende di diferente edat i abilidat por a move. E impakto ku bo tabatin ta bal muchu mas ku un simpel danki, p’esei mes nos ta gradesido ku bo a skohe The Annual Fitness Challenge pa hasi un diferensia. Ku e fondonan rekoudá aki abo a sòru ku mas persona ku ta sufri di un parálisis por haña yudansa i mehorá nan kalidat di bida atraves di e lokalidat di ehersisio, transporte sosial i diferente otro inisiativa mas durante di e aña aki.
Keda pendiente pa mas informashon pa e otro inisiativanan aki i kòrda semper ku #AboTambePor. Masha Danki!
