Fundashon Alton Paas ta gradesidu pa e di 5 edishon di The Annual Fitness Challenge
#UniDenMoveshon
WILLEMSTAD, Fundashon Alton Paas ta hopi kontentu i agradesido ku e kontesta riba e yamada di Fundashon Alton Paas #UniDenMoveshon. Spònser, boluntario, kolaborador i asta partisipantenan ku òf sin limitashon fisiko a uni huntu ku Fundashon Alton Paas den moveshon pa nos tur bai dilanti.
E di 5 Fitness Challenge di Fundashon Alton Paas tabata un mitar dia yena ku hende den moveshon. Tabatei presente komo parti di apertura Minister di bienestar sr Hensley Koeiman i tambe Minister di salubridat Suzy Camelia-Romer i tur dos a duna un palabra di animo i sosten na e mensahe pa nos komo Kòrsou keda den moveshon pa nos salu i bienestar. Despues di un konteo tur kos a start ku yoga den sala i alabes e spinning ku a sosode riba e parkeerplaats mes di International school. E kaminata a start bou di guía di The Jolly Walkers ku tur persona di 10km a sali prome i despues di algun minut e partisipantenan di 5 km tambe a sali. Tur persona tabata hopi satisfecho ku hinter e programa i tur instruktor a hasi un bon trabou. Tres instruktor a risibi un sertifikado spesial komo muestra di apresio pa nan sosten tur e 5 añanan konsekutivo den The Annual Fitness Challenge. E instruktornan tabata Charlyne Balentina ku ta duna Zumba, Helen Griffith ku ta duna Pilates i tambe Sabina Everts ku promé tabata duna Boogie Box Fitness i awor ta un di e instruktornan di spinning.
Danki na sponsernan manera Coca Cola, EWT, Satex Agencies, Bo Frei Agencies, Mangusa, Cost u less, Esperamos, Lovers i tambe Licores Maduro ku a sostene e evento ku nan produktonan pa kada partisipante por a sigi den moveshon ku e otro seshonnan. Semper e seshon di Pump-on-Wheels ta speshal i e biaha aki danki na kompanianan ku a sponser karchi por tabata tin mas hende den ròlstul ku a partisipá i tambe un grupo ku pa turno tabata subi e hancycle pa por a hasi spinning huntu ku e otro gruponan di spinning. Artistanan i personanan den media a uni ku e kousa pa bai hinter un ora di spinning. Por a konta ku Rachid Felida, Nicole Maduro, Axel Pikero, dj Jowy, Leo Elizabeth, David Hugo i tambe Sherry Koeijers.
Hinter un mainta positivo den moveshon. Fundashon Alton Paas ke gradisi tur hende ku a sostené i partisiá. Tur boluntario, sponser, medionan di komunikashon ku a yuda promové e mensahe ku tambe a hasi e di 5 edishon un eksito.
