Tur instruktor i ruta ta kla pa e

Kaminata, Fitness i Spinning na e di 5 edishon di The Annual Fitness Challenge

WILLEMSTAD, Djadumingu 4 di Mart próksimo lo tuma lugá e siguiente Fitness Challenge organisá pa Fundashon Alton Paas. E evento aki ta tuma lugá manera kustumber na International School. Durante un konferensha di prensa huntu ku instruktor i tambe organisashonnan ku a uni den e kousa fundashon a partisipá ku nan ta hopi kontentu i agradesido ku e reakshonnan despues di a publiká e tema pa Uni Kòrsou Den Moveshon. Pa e dia aki tin diferente aktividat deportivo na kua henter pueblo di Kòrsou i kompanianan por partisipá na e Fitness Challenge. Ademas di traha riba e kondishon partisipantenan ta kontribuí na krea fondo pa Fundashon Alton Paas sigui ku e tremendo trabou pa personanan ménos abilitá.

E di 5 Fitness Challenge di Fundashon Alton Paas lo ta aun mas grandi ku e añanan anterior. Diferente instruktor i tambe organisashon a uni ku Fundashon Alton Paas pa hasi e fundraising aki un éksito. Lo bai tin Kaminata, Fitness i Spinning. E aktividat ta tuma lugá di  6 ‘or di mainta te 12 ‘or di mèrdia. E área di Fitness lo konsentrá den sala. Tin 8 instruktor ku a kontribuí pa por a krea e skema di dia. Entre nan Janina Ilha ku lo duna Yoga, Pro Bella Fit ku lo sòru pa Circuit Training, Frank Wong ku lo duna Tai Chi kual ta un dje seshonnan spesial pa personanan ku ta òf ta sinti nan mes riba 60, Charlyne Balentine ku lo duna Zumba, Ruth Kroes ku ta guia Pump On Wheels kual ta e seshon pa personanan den ròlstul, Raimundo Betancourt ku lo duna Fit Combat, Helen Griffith ku lo sòru pa Pilates i e último pa fitness lo ta Licyanne Gijsbertha ku lo duna FitAffinity Kids Fitness.

Pa e área di spinning Body Beach a uni ku Fundashon Alton Paas i a pone 15 baiskel di spinning disponibel. Body Beach a pone dos instruktor disponibel kual ta Meliza Garmers i Mike Vos.

E otro instruktornan pa e parti di spinning lo ta Diana Lawton, Kristely Soleana, Wendley Urselita i Sabina Evertsz. E instruktornan aki lo guia e kompania òf gruponan ku a registrá i a forma nan ekipo pa spin durante e 6 oranan. Tur aña Fitness Challenge a krese i a base di petishon a skohe e aña aki pa inkluí un kaminata den e Fitness Challenge. Pa esei lo tin dos ruta di kaminata. Un di 5 kilometer i e otro di 10 kilometer i lo ta na enkargo di Jolly Walkers ku lo e sòru pa tur detaye pa e kaminata kana bon.

Manera ta e kaso ku tur e  otro edishonnan por konta un biaha mas ku dj Quiltje ku e bia aki tambe lo sòru pa músika. Massive tambe a bin ta koperá pa 5 aña konsekutivo ku Annual Fitness Challenge ku ekiponan di zonido. Algu diferente mas pa e aña aki ta e MC nan. E organisashon di Clini Clowns tambe a uni ku e kousa i lo sòru pa algun clowns spesial pa e edishon aki ku lo guia e programa i sòru alabes pa un ambiente kómiko pa tur partisipante.

Karchi pa e kaminata pa tur persona ta 15 florin. Karchi pa e fitness ta inkluí tambe kaminata i ta 15 florin pa hóben di 8 pa 15 aña i 60+ i pa adulto lo ta 35 florin. Pues karchi di fitness ta bálido pa kaminata i fitness.

Tur aktividat lo kuminsá pareu for di 6 ‘or di mainta na International School. Fundashon Alton Paas ta enkurashá tur persona ku lo partisipá pa chèk e skema pa sa ki ora nan seshon di fitness(nan) faborito lo tuma lugá. Por skohe tambe pa challenge bo mes pa e Fitness Challenge kompletu. Pa kompra di un karchi di 35 florin por bai e kaminata i bin bek pa hasi fitness den sala. Karchinan ta disponibel na Samson Colon, Mensing Caminada i Van Den Tweel Zeelandia.

Fundashon Alton Paas ta hopi agradesido na tur organisashon ku a uni forsa, tur instruktor i organisashon ku  ta kontribuí pa guia e aktividatnan, tur spònser i kompania ku ta koperá, tur boluntario i tur persona ku di un òf otro manera ta kontribuí na e selebrashon di e di 5 edishon di Fitness Challenge. Éksito di e ‘challenge’ mes lo ta partisipashon di pueblo. P’esei Fundashon Alton Paas ta invitá tur persona i kompania òf grupo pa forma nan tim pa kumpra karchi mesora i partisipá na e di 5 edishon di Fitness Challenge pa huntu #UniDenMoveshon.