na e evento di fitness mas grandi di Kòrsou, kordiná pa Defense Force Curaçao
WILLEMSTAD, E di 10 edishon di e The Annual Fitness Challenge ta bini ku mas energia ku nunka promé, ku dos elemento nobo pa pone henter komunidat riba moveshon, inkluso nos chikitinnan.
E di 10 edishon di The Annual Fitness Challenge, organisá pa Fundashon Alton Paas lo tuma lugá dia 18 di Mei 2025 na International School of Curaçao, mes lugá kaminda ela kuminsá 10 aña pasá. E Annual Fitness Challenge ta un maraton di 6 ora ku kaminata di 5 i 10 Kilometer, Spinning, i seshonnan di Fitness manera Yoga, Fit Combat, Zumba, Pilates, Line dancing, Pump-on-wheels, BBB i Circuit—tur ku e mesun meta: yuda hende ku dwarslaesie i otro retonan neurológiko pa mantené un bida mas digno i aktivo.
Un elemento nobo ta Kids Power Zone, ku ta un área spesial pa mucha ku ta inkluí retonan físiko i aktividatnan di dibertishon, kordiná pa Defensha di Kòrsou. E zona ta stimulá retonan estilo opstákulo i weganan físiko spesialmente diseñá pa yuda muchanan keda aktivo, kompremeté i ta parti di e moveshon.
E otro nobo elemento pa e aña aki ta e Impact Ride-Off—un kompetensia amikal di spinning di 5 kontra 5 entre kompanianan, kordiná pa Training Bike Curaçao, ku e spinbikenan di Burnard’s Health & Fitness Center. Diferente for di añanan anterior, e seshonnan di spinning ta dura 90 minüt, pa duna un reto mas grandi pa gruponan di kompania i partisipantenan individual. Pa partisipá na e elemento nobo aki kompania i partisipantenan mester registrá.
E kompania ku gana lo haña un pakete di premio inspirativo, ku ta inkluí:
✔ Un sertifikado ku un potrèt dje grupo pa kologá den e kompania
✔ Un seshon di motivashon pa empleadonan
✔ Un bishita ‘behind the scenes’ na Fundashon Alton Paas
✔ Un seshon edukativo tokante inklushon pa yuda e kompania bira mas aksesibel i inklusivo.
“E di 10 edishon aki di The Annual Fitnesss Challenge no ta solamente un selebrashon,” segun Alton Paas, fundadó di Fundashon Alton Paas. “E ta pa honrá e forsa di perseveransia i inklushon. Loke a kuminsá komo un fundraising, a bira awor un plataforma grandi pa krea konsenshi i duna hopi hende e oportunidat pa bin huntu i pa move pa dilanti.”
Karchinan ta optenibel na 3 punto di benta ku ta: Mensings Caminada, Van den Tweel (Zeelandia) i Ofisina di Fundashon Alton Paas (Colon).
Pa mas informashon, registrashon pa spinning, òf preguntanan di prensa, por fabor tuma kontakto via:
📧 info@fundashonaltonpaas.org
🌐 www.fundashonaltonpaas.org