Esaki ta e mensahe prinsipal tras di un entrenamiento ku Fundashon Alton Paas a organisá pa su shofùrnan i otro miembronan di e ekipo di Fundashon Alton Paas. E entrenamiento, duná pa Danny Evers di I Am Consultancy, tabata parti di e kampaña di konsientisashon ‘Akseso pa Tur’, pa promové inklushon, subi e nivel di servisio, i kambia e manera kon publiko ta mira hende ku un limitashon.
Den kuadro di e kampaña di konsientisashon ‘Akseso pa Tur’, Fundashon Alton Paas a finalisá ku èksito un entrenamiento di tres dia pa su shofùrnan i otro miembronan di e ekipo. E entrenamiento tabata enfoká riba kresementu profeshonal i mehoramentu di e kalidat di servisio ku nos ta ofresé na e kliente di nos servisio di transporte aksesibel, Wheelee.
E kampaña ‘Akseso pa Tur’ tin tres meta prinsipal: kambia e persepshon di publiko tokante hende ku un limitashon, subi e
nivel di servisio ku entrenamiento i inovashon, i traha mas na kolaborashon pa promové inklushon. E entrenamiento aki ta un paso importante pa logra e segundo meta ku ta sigurá ku kada interakshon ku Wheelee ta reflehá empatia, profesionalismo i rèspèt.
Durante e seshonnan di entrenamiento, e partisipantenan a sigui topikonan manera komunikashon efektivo, kompetensianan di servisio, i e diferensia entre ‘servicegerichtheid’, ‘klantvriendelijkheid’ i ‘klantgerichtheid’. E seshonnan tabata hopi interaktivo inkluyendo praktikanan for di ehèmpelnan real, ku a duna oportunidat pa reflekshon i interkambio entre koleganan.
Aparte di e konosementu, e entrenamiento tambe a sirbi komo un aktividat di teambuilding. E evaluashon final a mustra un promédio di ‘8.8 riba 10’, kaminda e partisipantenan a balorá e ehèmpel prátiko i e interakshon den grupo komo e parti mas balioso.
Fundashon Alton Paas ta kere ku desaroyo kontinuo di su personal ta fundamental pa logra su mishon. Nos balornan di ‘sirbi hende’ i ‘desaroyo’ ta den tur kos ku nos ta hasi. Desaroyo kontinuo komo tim ta nifiká mehorá e manera nos ta sirbi nos klientenan speshalmente hende ku un desabilidat, ku ya ta enfrentá hopi bareranan den bida di tur dia. Ku e tipo di entrenamiento aki, nos ta traha pa baha e bareranan aki i e ta kuminsá na e manera ku nos ta sirbi.