10 tip di un neurosikologo pa pasa door di e krisis aktual

Mundialmente nos ta pasando dor di e pandemia di COVID-19.  E menasa di e coronavirus aki ta di un durashon deskonosí anto ku por afektá kualkier persona. Meskos ku kualker virus di influenza e Coronavirus aki ta hopi kontagiabel, anto no tin un antivirus ahinda p’é. Hopi hende a muri rònd mundu kaba dor di komplikashonan respiratorio kausá dor di e virus aki. E kantidad di infektadonan dor di COVID-19 ta aumentá kada dia.

Na Kòrsou tambe nos ta wòrdu afekta dor di esaki. Pa evitá e virus di plama, nos mester di e kuerentena obligatorio. Esaki ta probokando un krisis ekonómiko, sosial i laboral den nos komunidad. Nos por mira tambe ku e corona virus ta probokando konsekuenshenan grave pa salú mental den nos poblashon. Esaki por sosode den diferente nivel, simplemente paso nos bida a kambia di un forma abrupto. Nos no a prepará mentalmente pa esaki anto e situashón ta rekerí pa nos adaptá na e bida otro aki. Nos ta pasando den un krisis en general. Pa algun persona e adaptashon por sosode di forma natural, pero pa otronan e kambionan lo ta mas difisil generando iritashon, disgustu òf otro forma di inkomfortabilidad.

Nos no mester lubidá riba e personan mas vulnerabel den nos komunidad, hesta nos adulto mayornan, hendenan ku un malesa króniko, un desabilidad mental òf físiko i esnan ku ya tabata sufri di algun problema sikológiko.  Pa e grupo aki e adaptashon na e situashon nobo lo por ta un desafío adishonal den nan bida. Mi ke kompartí aki algun tip pa por yuda mantene nos salú mental.

1. Wak e kuarentena komo un periodo diferente den bo bida. Kuarentena ta implika pa hiba un ritmo di bida diferente.
2. Invertí tempu na bo salú. kurpa-mente-spiritu den balansa
3. Dosifiká e kantidad di informashon. Loke ta importante pa loke ta trata COVID-19 ya nos sa kaba. Gobiernu ta informanos debidamente anto ta tumando medidanan pa nos seguridad. No buska i manda notisianan katastrófiko.
4. Organisá bo siman: Hasi un lista di kos ku bo mester hasi pa siman i plan esaki durante siman. Administra bo tempu ku kosnan varia pa hasi.
5. Kome saludabel: nutri bo kurpa ku alimentonan ku ta subi bo Sistema inmunológiko
6. Hasi ehersisio fisiko: na kas por hasi un kantidad di ehersisio anto esaki por wòrdu hasi pa tur hende, inkluyendo esnan ku malesanan kroniko i asta personan ku un lomitashón físiko.
7. Tene kuenta kubo tempu: Drumi na tempu, kome na tempu, mantene momentunan di sosiegu mei mei di aktividatnan
8. Interakshon sosial: kombersa mas, hari mas, kompartí aktividat ku otro, sostene otro
9. Mantene bo mes konektá: Dor di teknología nos por mantene kontakto di un forma virtual ku bo famia i amigunan. Esaki por yuda nos sostene otro durante e temporada aki.
10. Buska e trankilidad: Tuma tempu pa bo mes, tempu pa medita, pa hasi orashon. E hecho ku nos no por sali pa deskarga energia, ta buta ku nos mester buska e trankilidad den un momentu nos so. Komunika ku Dios, e por duna nos e pas, mei mei di e tormenta.

Laga nos inverti nos tempu bon pa nos propio bienestar. Ban yuda otro i sostene otro den e temporada aki.
Esaki ta un video ku e neurosikólogo ta papia tokante e konsekuensianan sikologiko di e temporada aki.

E blog aki ta skibi pa: Drs. Martha Faulbon-Atienzo, neurosikólogo
si bo ta rekonose bo mes den e video, no duda pa tuma kontakto ku Drs. Martha Faulbon-Atienzo.
Whatsapp:+5999-5138457, e-mail: sabervivircur@gmail.com