Fundashon Alton Paas ta pone atenshon na ‘World Spinal Cord Injury Day 2025’
WILLEMSTAD, KÒRSOU — Na okashon di ‘World Spinal Cord Injury Day 2025’, dia 5 sèptèmber 2025 Fundashon Alton Paas ta uni ku e komunidat mundial pa trese atenshon na e tema importante di e aña aki: “Prevení kaimentu, protehá Wes’i Lomba.”
Komo fundashon pa personanan ku leshon na wes’i lomba, e fundashon ta hasi un yamada pa mas konsientisashon i inisiativa preventivo pa evitá kaimentu ku ta un di e kousanan di leshon na wes’i lomba rònt mundu.
Kaimentu por pasa na kualke momentu, na kualke lugá, ku kualke persona — na kas, na trabou òf simplemente na luganan publiko. Na Kòrsou, kaimentu ta kousa hopi aksidente serio ku por kambia un bida totalmente. For di datonan ku nos a risibí di CMC na aña 2024 CMC a trata 26 persona ku a kai entre edat di 0 pa 79 aña i na 2025 tabata tin 5 total entre edat di 20 pa 69 aña. Na aña 2024 entre 0 pa 9 aña tabata tin 7 persona di kual 6 ta mucha muhe i 1 mucha hòmber. Di e kantidat total di 26 persona, 8 ta hende muhé i 18 hende hòmber. Na 2025 e kantidat di 5 persona, tur tabata hende hòmber.
Sinembargo, mayoria di kaimentu ta prevenibel ku e informashon korekto, sosten i kambionan ambiental i e hèrmèntnan nesesario.
“Na Fundashon Alton Paas, nos ta kere den poder di prevenshon,”. “Nos mishon ta traha na mihó kalidat di bida, prevenshon di komplikashon mediko, promové inklushon i fortifiká nos komunidat i esaki ta kuminsá ku evitá aksidente inesesario manera kaimentu.”
E kampaña mundial di e aña aki ta pone enfoké riba 4 aria prinsipal:
- Edukashon i Konsientisashon: Hala atenshon di publiko i eduká komunidat tokante riesgo di kaimentu.
- Ambiente Sigurá: Pidi pa duna mas atenshon na seguridat di kas, lugá di trabou i espasio publiko. Sòru pa ‘handrails’, mihó iluminashon, bon hèrmèntnan i kamindanan sin opstákulo.
- Empoderashon: Duna e persona ku leshon na wes’i lomba i e personanan ku ta yud’e e hèrmènt i entrenamentu nesesario pa evitá kaimentu i pa manehá riesgonan den bida diario.
- Investigashon i Inovashon: Sostené desaroyo den rehabilitashon, rehabilitashon-posterior, teknologia asistivo i otro solushon pa protehá salú di e wes’i lomba.
Fundashon Alton Paas ta hasi un yamada na tur hende na Kòrsou. Individuonan, famianan, dunadónan di trabou, trahadónan di maneho i dunadónan di kuido pa tuma parti den e moveshon. Huntu nos por evitá leshon, trese speransa i krea un futuro mas inklusivo i sigur pa tur hende.
“Prevenshon di kaimentu ta protehá bida, duna speransa i posibilidat. Laga nos huntu tuma akshon ku ta kambia bida”.
