Kòrsou – Fundashon Alton Paas ku hopi plaser ta anunsiá e gran éksito di su evento resientemente di Fundraising Taco Take Out, ku a tuma lugá dia 18 di òktober último na Café Magic. Danki na e sosten inkreíbel di komunidat, nos a bende mas ku 700 Taco Kits i a rekoudá fondonan krusial pa finansiá programanan esensial ku tin komó meta pa mehorá kalidat di bida di esnan ku dwarslaesie i otro problemanan neurologiko.
E fondo rekoudá durante e Fundraising Taco Take Out ta bai direktamente pa yuda nos vishon di kreá un futuro sin limitashon, bahando e barera pa transporte aksesibel i sigurando ku mas hende por haña servisio di ehersisio pa sigui mantené o mehorá nan kalidat di bida. Un di e personanan, Raymian, un elektrishèn ku su mobilidat tabata seriamente afektá, a kompartí su historia kon ela haña su speransa i independensia bèk danki na e servisio ku e AP Center di Fundashon Alton Paas ta duna. Despues di kuminsá na AP Center, Raymian a bai di dependé di un ròlstùl pa kana ku un garoti, mustando asina e impakto real di bo sosten.
Highlights di e Evento
E evento Taco Take Out no solamente tabata un oportunidat pa disfrutá di un kuminda dushi, pero tambe un momentu pa uní nos forsa pa un kousa ku ta realmente importante. Un di e momentu mas spesial tabata e donashon di 150 kuminda pa esnan ku mas mester di dje, ku a keda entregá atrabes di un koperashon ku Voedselbank. E entrega di e Taco Kit nan aki a bira posibel danki na e generosidat di kompanianan lokal i personanan ku a kumpra e Taco kit i a skohe pa duna nan na esnan den nesesidat. E personanan ku a presentá pa haña nan Taco i a keda kome na Café Magic a disfrutá di e dushi ambiente di e grupo Mariachi Solis i tambe Dj Quilan, ku a hasi e ambiente aun mas sabroso. E feedback di e evento tabata sumamente positivo, ku partisipantenan gabando e Taconan delisioso i mustrando un eksperiensia tremendo, bon organisá.
Sostenedó i Patrosinadó prinsipal
E evento aki no tabata posibel sin e sosten di hopi kompania lokal, inkluyendo sostenedórnan notabel manera Carin Cares, ku no solamente a kumpra karchi, pero tambe generosamente a duna Taco kit na nan klientenan nobo di nan servisio di boton di alarma. Ku Pedagogia Kinderopvang, bisiña di Café Magic, tambe tabatin un kolaborashon, kaminda fundashon a haña e oportunidat pa duna un charla riba inklushon na un grupo di mucha di edat 4 te 12 aña. Nos ke gradisí tambe e kòki Ilan Martina i su team pa por a prepará e delicioso Taco nan.
Nos kier ekstendé un danki spesial na nos patrisinadónan prinsipal, inkluyendo Firgos, Van Den Tweel, Dany’s Grocerie, Boulevard Supermarket, Aqualectra, JD Transport, Clincho, Curacao Packaging Center, Distribier, Living Fashion, Deli Nova, Franky’s Chairs and Tables Rental, We love food Curaçao, Step it Up, i Pietersz Import. Banda di esei, un grupo dediká di 17 boluntario a hasi posibel ku e evento a kore manera debe ser, ku algún di e studiantenan di Curacao Medical University kende generosamente a duna nan tempu pa yuda e kousa komo boluntario.
Moviendo Pa Dilanti
Konkluyendo e evento aki, ya nos ta planeando pa otro aña. Mientras tanto, esnan ku ke sigi yuda nos kousa por hasi un donashon òf inskribí komo boluntario pa kontribuí den nos esfuersonan kontinuo pa sirbi e komunidat di dwarslaesi i otro situashonnan neurologiko.
Un Danki di Kurason
Na nòmber di tur persona na Fundashon Alton Paas, nos ta ekspresá nos gratitut di kurason na tur persona, patrosinadó, boluntario, i e komunidat ku a hasi e evento aki un eksito tremendo. Boso sosten ta mas ku un kontribushon—e ta un invershon den e futuro di nos komunidat i den bida di esnan ku ta dependé di nos servisio. Huntu nos a mustra ku un kuminda simpel por trese speransa, kambiá bida, i fortalesé nos komunidat.
Masha danki pa ta parti di e desaroyo signifikativo aki. Nos ta spera ku tin hopi momentu mas di impakto i speransa, i nos no por warda pa kompartí loke ta bini despues. Masha danki!
