Dia 7 di desèmber ultimo e facultat di FMG ku ta trata e area di trahado sosial a organisá un mini konferensia tokante desabilidat. Komo orador prinsipal tabata tin Saugnella Attaf-Jakoba ku ta un ortopedagogo trahando na De SGR-Groep i Fundashon Kontakto. E dekano di e fakultat mes a anunsia komo inisio di e mini konferensia ku a yega ora pa dediká mas atenshon na e situashonnan di desabilidat i pa inkluí e topikonan di desabilidat tambe den e kombersashonnan.
E presentashon di Saugnella a duna un bista di e bida di un persona ku un desabilidat mental leve. Dor ku den nan kaso nan desabilidat no ta visibel ta verwacht di nan inkonsientemente di ta funshoná meskos ku kualke persona pero den e kaso aki nan IQ ta asta mas abou. Esaki ta nifiká ku asta prosesamentu di informashon ta bai otro. No ta tene kuenta por ehempel den un rueda di prensa ku ta publiká informashon pa por hasi esaki pa e grupo di personanan aki tambe por komprondé.
Saugnella den su presentashon a pone un frase ku ta bisa:
Ami no a skohe pa tin un desabilidat pero abo ku ta traha kumi si a skohe pa traha ku un persona ku un desabilidat.
Esaki pa duna e mensahe pa e personanan ku ta traha den e area pa dediká mas atenshon i amor na nan klientenan. Ta personanan ku tambe tin meta, deseo i soñonan meskos ku tur otro persona pero tin mester di èkstra guia i atenshon pa alkansá esaki.
E di dos parti di e mini konferensia tabata konsistí di un panel ku 5 panelista kual tabata sranan Saugnella Attaf- Jakoba, Miranda Fraai di asosashon di Mayor Totolika, Kendra Evertsz di Fundashon Pro Bista, Aisha Gressmann ku ta dosente na e skol spesial Sour Hedwig School i sr. Alton Paas presidente di Fundashon Alton Paas.
Durante di e panel tabata tin 4 ponensia ku tabata i Riba e ponensianan aki tabatin hopi reakshon di sala. Pregunta den sala, por ehempel ta ku tin famianan ku miedu di keda stigmatisá dor di tin un yu ku desabilidat i pesei tambe fasilmente ta keda sin sali òf partisipá den komunidat. E pregunta tabata kiko ta e eksperensia di e panelistanan ku famianan ku ta pensa asina òf kon ta guia famia i mayornan ku ta pensa asina.
Un punto ku tambe a resaltá tabata kolaborashon. E reto ta ku hopi bia ta traha pa yuda un kliente pero dor di falta di kolaborashon e yudansa ku a duna e kliente ta keda pornada pasobra e kliente ta bolbe bai kai bèk den situashonnan no desea. Esaki ta sosodé sigur den e area di enseñansa ku bo ta haña muchanan spesial ku ta kaba skol pero no tin un vervolg òf ta logra prepará nan pa skol pero skolnan no ta tuma nan bèk.
Tin hopi desaroyo positivo sigur den e area di desabilidat pero tin algun reto ku solamente ora nos bin huntu asinaki nos ta logra komprondé mihó kiko ta pasando. Kada organisashon i profeshonal ta asina dediká riba nan area i nan klientenan ku no ta sobra espasio pa yega na un impakto mas grandi. Speshal mirando ku e area di desabilidat ta algo mas grandi i tin mas stakeholder envolvi ku ainda por duna mas input pa yega na un bista total di desabilidat na Kòrsou.
Pesei un di e konklushonnan sigur di parti di UoC na final tabata ku mester sigui organisá seshonnan asinaki i no te 3 di desèmber 2022. Durante aña mester por tin mas interkambio i kolaborashon pa yega na mas solushon na bienestar di personanan ku un desabilidat.
Potrètnan saka pa: Margo Groenewoud