WILLEMSTAD, Djabièrnè 3 di desèmber, 12 Fundashon ku ta traha pa personanan ku un desabilidat a logra hala atenshon un biaha mas pa selebrá Día Internashonal di Personanan ku un Desabilidat.
Manera ya ta konosi ku e aña aki ta di dos bia ku e 12 fundashonnan, Fundashon Pro Bista, Fundashon Alton Paas, Asosiashon Totolika, De SGR-Groep, Stichting voor Auditief Gehandicapten, Fundashon Amigunan Uni, Fundashon Kontakto, Handicaps Rights Foundation, Sentro Solaris, Funditut, i Stichting MS a bini huntu pa dediká atenshon na e fecha pero di un otro forma i atrabés di diferente aktividat.
Nos página riba Facebook ku e nòmber Selebrá Abilidat, riba kual a publiká diferente video di konsientisashon, a resultá un éksito total.
E selebrashon di dia 3 di desèmber a kuminsá na Forti i kaba na Brionplein. Despues di un orashon a kuminsá ku e kaminata, kaminda nos Promé Minister, sr. Gilmar Pisas, i e representante di SOAW, sr. A. Herramienta, a personifiká un persona den ròlstul mientras ku parlamentario, sra Anna-Maria Paulleta i sra R. Albertina, konsehero di Promé Minister a personifiká un persona siegu. E eksperensia di kon un persona ku desabilidat ta sint’é a resultá unu di gran balor pa krea mas empatia pa personanan ku un desabilidat pa asina por komprondé i yuda nan mas mihó.
Na yegada na e pérgola riba Brionplein Promé Minister a hiba palabra i a entrega Promé Minister un karta den kual e 12 organisashonnan ta hasi un petishon pa Gobièrnu di Kòrsou raktifiká e tratado di Nashonnan Uní relashoná ku derechinan di personanan ku un desabilidat. Hulanda a firma e tratado día 30 di mart 2007 i día 14 di yüli 2016 e tratado a drenta vigor na Hulanda. Huntu ku e karta tin tambe diferente punto di atenshon ku e fundashonnan a inventarisá ku ta mustra e importansia pa ratifikashon di e tratado pa asina bini ku leinan ku ta sòru pa e personanan ku un desabilidat na Kòrsou por biba na un 
manera digno. Alabes e 12 fundashon a mustra disponibilidat pa asistí gobierno den e proseso aki pa un mihó resultado.
Un di dos parti di e programa tabata kaminda sra Naömi Panneflek, arkitekto, a splika kon lo pone un rampa na e pergola. Esaki komo simbolo pa siguí mehorá aksesibilidat na Kòrsou. Un rampa so no ta hasi Kòrsou aksesibel pero e ta un stap mas dilanti i pesei mester gradisí departamentunan di gobierno pa e pèrmitnan nesesario, ergotherapeut Maaike Versteeg i tambe e kompania di konstrukshon Q-Con Quality Constructors NV ku den yanüary 2022 lo kuminsá konstrukshon di e rampa pa asina un hende den ròlstùl tambe por subi e pergola ora tin evento riba Brionplein.
Tambe a hiba palabra Noraima Dorothea di Fundashon Amigunan Uni i Dayaran Vrutaal di Fundashon Kontakto ku a duna un mensahe den kuadro di e dia.
E 12 fundashonnan kier a gradisí tur instancia ku a duna un aporte financiero ku ta Active chance, Johannes Bosco, MCB, Gewi, Banco di Caribe, IBIS, Guardian Group Fatum, BTP, Ralfmed, Vida Nova Bank, ADC, Wit Gele Kruis, Carin Cares, Optica Antiliana, El Tributo i tur persona ku a partisipá na e dia aki ya ku sin nan e dia lo no por tabata unu éksitoso. Masha danki!
